អឺរ៉ុប៖ យោងតាមអ្នកសារព័ត៌មាន Tariq Panja នៃកាសែត Sports បានបង្ហើបឲ្យដឹងថា សហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA និង CONMEBOL ដែលជាសហព័ន្ធកីឡាបាល់ទាត់ទ្វីបអាមេរិកខាងត្បូង កំពុងពិភាក្សាក្នុងការបង្កើតការប្រកួតរវាង ក្រុមជើងឯក UEFA Euro 2020 គឺ ក្រុមជម្រើសជាតិ អ៊ីតាលី ជាមួយក្រុមជើងឯក Copa America 2021 គឺ ក្រុមជម្រើសជាតិអាហ្សង់ទីន ដើម្បីឧទ្ទិសដល់វីរបុរសបាល់ទាត់ដែលទើបលាចាកលោកកាលពីខែវិច្ឆិកា ឆ្នាំ ២០២០គឺលោក Diego Maradona។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Maradona គឺជាជនជាតិអាហ្សង់ទីនមែនពិតតែលោកបានទទួលការគោរពស្រឡាញ់ពីសំណាក់ប្រជាជនអ៊ីតាលីទាំងមូលជាពិសេសគឺប្រជាជននៅក្រុង Naples ព្រោះលោកធ្លាប់បានលេងនៅក្លិប Napoli អស់រយៈពេលជាង៧ឆ្នាំ។
ហេតុដូច្នេះទើបខាងសហព័ន្ធកីឡាបាល់ទាត់ទាំងពីរបានផ្ដួចផ្ដើមរៀបចំការប្រកួតរវាង អ៊ីតាលី និងអាហ្សង់ទីន តែការប្រកួតនេះធ្វើឡើងតែមួយជើងប៉ុណ្ណោះ។
គួរបញ្ជាក់ផងដែរថាក្រុមជម្រើសជាតិទាំងពីរនេះធ្លាប់ជួបគ្នាកាលវគ្គពាក់កណ្ដាលផ្ដាច់ព្រ័ត្របាល់ទាត់ពិភពលោកឆ្នាំ១៩៩០ នៅទីក្រុង Naples ដោយ អាហ្សង់ទីន បានបំបាក់ អ៊ីតាលី ដោយបាល់ប៉េណាល់ទីកាត់សេចក្ដី ៤ ទល់នឹង ៣ ក្រោយលេងស្មើនៅម៉ោងប្រកួតផ្លូវការ ១ ទល់នឹង ១៕
ប្រភព៖ football-espana