Chelsea នឹងដាក់លក់កីឡាករ៥រូប ខណៈម្ចាស់ក្លិបជះលុយរយលានឲ្យ Tuchel ទិញយកតារាឆ្នើមម្នាក់នេះ

អង់គ្លេស៖ យោងតាមសេចក្ដីរាយការណ៍ពី Bild លោក Roman Abramovich ដែលជាម្ចាស់ក្លិបតោខៀវ Chelsea ពិតជាស្រឡាញ់ពេញចិត្តខ្សែប្រយុទ្ធ Erling Haaland ណាស់និងបានផ្ដល់កញ្ចក់ទឹកប្រាក់ឲ្យលោកគ្រូ Thomas Tuchel ទិញយកគេមកទឹកដី Stamford Bridge ឲ្យបាន។

នេះបញ្ជាក់ថា Haaland នៅតែជាគោលដៅធំរបស់ Chelsea ខណៈដែលកីឡាករសញ្ជាតិន័រវេសដែលរកបាន៥៧គ្រាប់ក្នុងការបង្ហាញខ្លួន៥៩លើករូបនេះមានតម្លៃខ្លួនខ្ទង់១៥០លានផោន (ស្មើនឹងប្រមាណ២០៧.២លានដុល្លារ)។

យ៉ាងណាមិញ លោក Michael Zorc ដែលជាប្រធានផ្នែកដឹកនាំរបស់ Borussia Dortmund បានបង្ហើបថា Haaland នឹងស្នាក់នៅជាមួយក្លិបនៅរដូវកាលនេះបន្តទៀត។

ទន្ទឹមគ្នានោះដែរ Chelsea នឹងដាក់លក់កីឡាករក្នុងក្រុមរបស់ខ្លួនដើម្បីសម្រាលបន្ទុកផ្នែកហិរញ្ញវត្ថុដូចជា ខ្សែប្រយុទ្ធ Callum Hudson-Odoi ,Tammy Abraham និង Hakim Ziyech ។

ក្លិបក៏ចង់លក់ខ្សែការពារ Kurt Zouma ផងដែរបើសិនជាក្លិបផ្សេងផ្ដល់សំណើខ្ទង់ ៣០លានអឺរ៉ូ(ស្មើនឹងប្រមាណ៣៥. ៣លានដុល្លារស្របពេល ខ្សែប្រយុទ្ធ Olivier Giroud ដែលទើបបន្តកុងត្រាថ្មីក៏ត្រូវបានគេរាយការណ៍ថានឹងផ្ទេរទៅ AC Milan នៅសប្តាហ៍នេះផងដែរ៕

ប្រភព៖ metro