ប្លែករហូត! បុរសរូបនេះ ស្លៀកឈុតដាយណូស័រ ទៅចាក់វ៉ាក់សាំង ផ្អើលគេពេញមណ្ឌល

ម៉ាឡេស៊ី៖ មហាជនអ្នកប្រើប្រាស់បណ្ដាញសង្គម បានសម្ដែងការភ្ញាក់ផ្អើល និងអស់សំណើច ជុំវិញរូបភាពប៉ុន្មានសន្លឹក ដែលថតបង្ហោះចែកចាយនូវសកម្មភាព បុរសម្នាក់ ស្លៀកឈុតដាយណូស័រ ទៅចាក់វ៉ាក់សាំងការពារជំងឺកូវីដ-១៩។

តាមប្រភពព័ត៌មានបានឲ្យដឹងថា រូបភាពទាំងប៉ុន្មាននេះ ត្រូវបានថតឡើងនៅមណ្ឌលចាក់វ៉ាក់សាំងមួយកន្លែង ក្នុងរដ្ឋ Sarawak នៃប្រទេសម៉ាឡេស៊ី ហើយយកទៅបង្ហោះចែកចាយដោយទទួលបានការចាប់អារម្មណ៍យ៉ាងខ្លាំង។

ជាក់ស្ដែង តាមរយៈ​រូបភាពនីមួយៗ បានបង្ហាញឲ្យឃើញពីជំហាននៃការទៅចាក់វ៉ាក់សាំង ដោយមានការតម្រង់ជួរ បំពេញសំណុំបែបបទ យកសំណុំបែបបទទៅកាន់កន្លែងចុះឈ្មោះ អង្គុយរង់ចាំវេនចាក់វ៉ាក់សាំង និងចុងក្រោយ ថតរូបទុកជាអនុស្សាវរីយ៍នៅស្ដង់ថតរូបជាការស្រេច។

យ៉ាងណាមិញ ជុំវិញសកម្មភាពខាងលើនេះ មិនបានបង្កជាការរំខានដល់មណ្ឌលចាក់វ៉ាក់សាំងឡើយ តែផ្ទុយទៅវិញ វាបានបង្កើតឲ្យមានភាពសើចសប្បាយ។ ហើយនេះជាវ៉ាក់សាំងដូសទីមួយសម្រាប់បុរសនោះផងដែរ៕

សូមទស្សនារូបភាពខាងក្រោម៖

ប្រភព: Mothership / IG