បុតស្វាណា៖ ក្រុមហ៊ុនរុករករ៉ែមួយបាននិយាយថា ត្បូងពេជ្រទម្ងន់១,១៧៤ការ៉ាត់ដ៏ធំសម្បើមមួយ ត្រូវបានគេជីករកឃើញនៅក្នុងប្រទេសបុតស្វាណា ហើយវាជាត្បូងពេជ្រធំលើកទី២ ដែលត្រូវបានរកឃើញនៅក្នុងប្រទេសនេះ ក្នុងចន្លោះពេលពីរបីសប្ដាហ៍ពីគ្នា។ វត្ថុដ៏កម្រនេះត្រូវបានរកឃើញនៅអណ្ដូងរ៉ែពេជ្រ Karowe កាលពីខែមុន ហើយបានប្រគល់ជូនរដ្ឋាភិបាលនៅក្នុងពិធីមួយ កាលពីថ្ងៃពុធ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រុមហ៊ុនរុករករ៉ែកាណាដា ឈ្មោះ Lucara Diamond បាននិយាយនៅក្នុងសេចក្ដីប្រកាសព័ត៌មានថា វាគឺជាពេជ្រទី៣ហើយ ដែលមានទម្ងន់ជាង១,០០០ការ៉ាត់ ដែលត្រូវបានរកឃើញនៅទីតាំងនោះ ហើយឥឡូវវានឹងត្រូវបានបញ្ចូលទៅជាក្រុមពេជ្រពណ៌ដ៏មានតម្លៃបំផុត។
ពេជ្រថ្មីមួយនេះមានទំហំធំជាងពេជ្រទម្ងន់១,០៩៨ការ៉ាត់ ដែលត្រូវបានរកឃើញនៅក្នុងប្រទេសបុតស្វាណាផងដែរ កាលពីខែមិថុនា ហើយវាត្រូវបានគេជឿថា ជាត្បូងពេជ្រធំជាងគេទី៣នៅលើពិភពលោក។ ប្រធានាធិបតីរបស់ប្រទេសបុតស្វាណា លោក Mokgweetsi Masisi បានចូលរួមក្នុងពិធីមួយនេះ នៅថ្ងៃពុធ ដើម្បីមើលត្បូងពេជ្រ។
កាលពីឆ្នាំ២០១៩ ក្រុមហ៊ុននេះបានរកឃើញអ្វី ដែលត្រូវបានគេជឿថា ជាពេជ្រធំបំផុតទី២ក្នុងប្រវត្តិសាស្ត្រ ដែលមានទម្ងន់១,៧៥៨ការ៉ាត់ នៅអណ្ដូងរ៉ែ Karowe។ បច្ចុប្បន្ន ត្បូងពេជ្រធំជាងគេបំផុត គឺ Cullinan មានទម្ងន់៣,១០៦ការ៉ាត់ ត្រូវបានរកឃើញនៅអាហ្វ្រិកខាងត្បូង ក្នុងឆ្នាំ១៩០៥។ ពេជ្រ Cullinan ត្រូវបានគេបំបែកជាគ្រាប់ពេជ្រតូចៗ ដែលខ្លះត្រូវបានគេដាក់លម្អលើមកុដនៃខ្សែរាជង្សអង់គ្លេស៕
ប្រភព: CNN