ពូជកណ្ដុរគួរឲ្យស្រលាញ់ ដែលគេគិតថាផុតពូជជាង១៥០ឆ្នាំហើយ តែរកឃើញថានៅមានជីវិត

អូស្ត្រាលី៖ កណ្ដុរមួយប្រភេទដែលគេគិតថាបានផុតពូជជាង១៥០ឆ្នាំទៅហើយ ត្រូវបានរកឃើញថានៅមានជីវិត នៅលើកោះមួយ ឃ្លាតពីឆ្នេររដ្ឋ Western Australia នេះបើតាមក្រុមអ្នកស្រាវជ្រាវ។ ក្រុមអ្នកវិទ្យាសាស្ត្របានប្រៀបធៀបសំណាកឌីអិនអេ សត្វកណ្ដុរផុតពូជចំនួន៨និងញាតិសន្តានចំនួន៤២ដែលរស់នៅ និងបានរកឃើញថា កណ្ដុរផុតពូជប្រភេទ Gould មិនអាចបែងចែកឲ្យដាច់ពីពូជកណ្ដុរ Shark Bay នោះទេ។

ក្រុមអ្នកស្រាវជ្រាវកំពុងសិក្សាអំពីការធ្លាក់ចុះនៃប្រភេទពូជសត្វដើម ចាប់តាំងការមកដល់របស់ពួកអឺរ៉ុបនៅអូស្ត្រាលី ក្នុងឆ្នាំ១៧៨៨។ កណ្ដុរដែលនឹងនៅតែត្រូវបានគេស្គាល់ដោយឈ្មោះទូទៅថា djoongari ឬ Shark Bay ត្រូវបានគេរកឃើញនៅទូទាំងប្រទេស ចាប់ពីភាគនិរតីនៃរដ្ឋ Western Australia ទៅរដ្ឋ New South Wales ប៉ុន្តែត្រូវបានគេឃើញចុងក្រោយនៅឆ្នាំ១៨៥៧។

ចំនួនសត្វកណ្ដុរ djoongari ដែលនៅសល់ មានទីតាំងនៅលើកោះទំហំ៤២គីឡូម៉ែត្រក្រឡា ក្នុងឆកសមុទ្រ Shark Bay គឺកោះ Bernier Island។ ក្រុមអ្នកស្រាវជ្រាវបាននិយាយថា ចំនួនដ៏តិចនេះមិនគ្រប់គ្រាន់សម្រាប់ប្រភេទសត្វមួយ ដែលអាចរស់នៅបាននោះទេ ដូច្នេះសត្វកណ្ដុរត្រូវបានយកទៅកោះចំនួនពីរផ្សេងទៀត ដើម្បីបង្កើនចំនួនថ្មី៕

ប្រភព: CNN