អង់គ្លេស៖ លោក Patrick Vieira និយាយថារូបលោកនៅមានមន្ទិលសង្ស័យចំពោះសមត្ថភាពរបស់ក្រុមជម្រើសជាតិអ៊ីតាលី និងគិតថាក្រុមមួយនេះទំនងជាមិនអាចឆ្លងដល់វគ្គផ្ដាច់ព្រ័ត្រក្នុងព្រឹត្តិការណ៍ Euro 2020 នោះឡើយ។
លោកបានបន្ថែមទៀតថាក្រុមរបស់លោកគ្រូ Roberto Mancini គឺនៅខ្វះភាពស្វិតស្វាញ កម្លាំង និងល្បឿនផងដែរ។
ក្រុមជម្រើសជាតិអ៊ីតាលីទើបតែយកឈ្នះ តួកគី ៣ ទល់នឹង ០ បន្ទាប់មកក៏បន្តយកឈ្នះ ស្វីស ៣ ទល់នឹង ០ បន្តទៀតធ្វើឲ្យក្រុមនេះក្លាយជាក្រុមដំបូងគេដែលឆ្លងដល់វគ្គ១៦ក្រុមចុងក្រោយបានសម្រេច។
អ្នកគាំទ្របាល់ទាត់បានស្ញើចសរសើរក្រុមជម្រើសជាតិអ៊ីតាលី ដោយគិតថាក្រុមមួយនេះអាចមានភាគរយបានទៅប្រជែងយកពាន Euro 2020 ជាមួយក្រុមខ្លាំងៗផ្សេងទៀតដូចជាបារាំងជាដើម ប៉ុន្តែ លោក Vieira បែរជាគិតថាពួកគេនៅខ្វះគុណភាព។
លោកបានថ្លែងប្រាប់ ITV Sport Studio ថា៖
ខ្ញុំគិតថាការប្រកួតទាំងពីរដែលអ៊ីតាលីលេងគឺជាការប្រកួតស្រួលៗប៉ុណ្ណោះ ខ្ញុំមិនគិតថាពួកអាចពិសោធន៍ខ្លួនថាពួកគេជាក្រុមខ្លាំងទេ។ ពិតណាស់អ្នកត្រូវតែឈ្នះការប្រកួតដែលចូលមកអ្នក ប៉ុន្តែខ្ញុំនៅតែមិនជឿជាក់ថាពួកគេអាចលេងដល់វគ្គផ្ដាច់ព្រ័ត្រនិងលើកពាន Euro ទេ។ ខ្ញុំគិតថាពួកគេនៅខ្វះភាពស្វិតស្វាញ ថាមពល និងល្បឿន ដើម្បីក្លាយជាក្រុមដ៏គ្រោះថ្នាក់មួយ។ខ្ញុំនៅតែរង់ចាំមើល ខ្ញុំគិតថាវាលឿនពេកហើយដែលអ្នកទាំងអស់គិតថាពួកគេចូលប្រជែងយកពាន Euro បាន។
គួរបញ្ជាក់ផងដែរថា ក្រុមជម្រើសជាតិអ៊ីតាលី ត្រូវប្រកួតជាមួយក្រុមជម្រើសជាតិវែលល៍ នៅថ្ងៃទី២០ខែមិថុនា វេលាម៉ោង១១យប់៕
ប្រភព៖ metro
Bong I.T