វីវរហើយ! FIFA អាចនឹងដាក់បំរាមមិនឲ្យប្រទេសមួយនេះចូលរួមលេងបាល់ទាត់ពិភពលោកឆ្នាំ២០២៦

អឺរ៉ុប៖ សហព័ន្ធកីឡាបាល់ទាត់ពិភពលោកហៅកាត់ថា FIFA បានគំរាម ប្រទេសន័រវេស ថាពួកគេនឹងដាក់បំរាមមិនឲ្យប្រទេសនេះចូលរួមលេងប្រកួតនៅព្រឹត្តិការណ៍បាល់ទាត់ពិភពលោកឆ្នាំ ២០២៦ បន្ទាប់ពីកីឡាកររបស់ជម្រើសជាតិន័រវេសទាំងអស់ បានធ្វើការតវ៉ាប្រឆាំងមិនឲ្យ FIFA ប្រារព្ធព្រឹត្តិការណ៍បាល់ទាត់ពិភពលោកឆ្នាំ ២០២២ នៅឯប្រទេស កាតា។

ខ្សែប្រយុទ្ធ Erling Haaland និងមិត្តរួមក្រុមជម្រើសជាតិន័រវេសទាំងអស់មិនសប្បាយចិត្តឡើយដោយគិតថា ប្រទេស កាតា មិនស័ក្តិសមធ្វើជាម្ចាស់ផ្ទះព្រឹត្តិការណ៍បាល់ទាត់ពិភពលោកឆ្នាំ ២០២២ ឡើយដោយសារតែការបង្ខិតបង្ខំឲ្យកម្មករធ្វើការសាងសង់កីឡដ្ឋានទាំងថ្ងៃទាំងយប់ ធ្វើឲ្យមានមនុស្សស្លាប់យ៉ាងហោចណាស់១២នាក់ក្នុងមួយសប្តាហ៍ដែលវាខុសនឹងច្បាប់នៃសិទ្ធិមនុស្ស។

ពួកគេបានពាក់អាវយឺតពណ៌សមួយមានពាក្យថា "Human Rights on and Off The Pitch (ត្រូវគិតដល់សិទ្ធិមនុស្សទាំងក្រៅនិងក្នុងទីលាន)" ដើម្បីប្រឆាំងនឹងរឿងនេះខណៈដែល សហព័ន្ធកីឡាបាល់ទាត់ន័រវេស ហៅកាត់ថា NFF បានបង្ហើបថាពួកគេនឹងធ្វើការពិភាក្សាគ្នាលើពហិការថាចូលប្រកួតនៅ ព្រឹត្តិការណ៍បាល់ទាត់ពិភពលោកឆ្នាំ២០២២ នេះឬអត់។

ដោយឡែក ក្រុមជម្រើសជាតិន័រវេស ក៏បានចូលលេងវគ្គជម្រុះព្រឹត្តិការណ៍បាល់ទាត់ពិភពលោកឆ្នាំ២០២២ ចំនួនបីប្រកួតរួចហើយដែរ។

ទាក់ទងនឹងការតវ៉ានេះ ខាង FIFA បានគំរាមទៅខាងក្រុមជម្រើសជាតិន័រវេស ថាបើមិនចូលរួម បាល់ពិភពលោកនៅ កាតា នេះទេ នោះ ន័រវេស នឹងត្រូវបង់ប្រាក់ផាកពិន័យចំនួន៤៣០០០ដុល្លារហើយ ន័រវេស អាចប្រឈមនឹងការមិនបានចូលលេងនៅ បាល់ទាត់ពិភពលោកឆ្នាំ២០២៦ ដែលធ្វើឡើងនៅបីប្រទេសគឺ សហរដ្ឋអាមេរិក, កាណាដា និង ម៉ិកស៉ិក ទៀតផង៕

ប្រភព៖ mirror