អង្គការណាសាត្រៀមបង្កើតតេឡេទស្សន៍អវកាស ដែលអាចការពារផែនដី ពីគ្រោះមហន្តរាយអាចម៍ផ្កាយ

បរទេស៖ អង្គការណាសាកំពុងចង់បង្កើតតេឡេទស្សន៍ថ្មីមួយ ដើម្បីរកមើលអាចម៍ផ្កាយនិងផ្កាយដុះកន្ទុយ ដែលអាចបង្កគ្រោះថ្នាក់ដល់ភពផែនដី។ តេឡេទស្សន៍អវកាសដែលហៅថា Near-Earth Object Surveyor ឬហៅកាត់ថា NEO Surveyor គឺជាផ្នែកមួយនៃការការពារភពផែនដី ពីអង្គដែលអាចចូលមកជិតផែនដី។ អាចម៍ផ្កាយនិងផ្កាយដុះកន្ទុយដែលមានចម្ងាយ30លានម៉ាយល៍ (40លានគីឡូម៉ែត្រជាង) ត្រូវបានគេស្គាល់ថាជាអង្គជិតផែនដី ឬហៅកាត់ NEOs។

NEO Surveyor នឹងត្រូវបានបំពាក់ដោយកាមេរ៉ាដែលអាចចាប់កម្តៅបាន ខ្លាំងជាងតេឡេទស្សន៍ដែលនៅលើផែនដីទៅទៀត។ ដោយប្រើតែទិន្នន័យអាំង​ប្រាក្រហម តេឡេទស្សន៍អវកាសនឹងអាចរកអង្គនោះបាន តាមដានទីតាំងវា និងគណនាទំហំរបស់វា។

អាចម៍ផ្កាយនិងផ្កាយដុះកន្ទុយបានកម្តៅពីព្រះអាទិត្យ ហើយពួកវាបញ្ចេញកម្តៅដែលធ្វើឱ្យតេឡេទស្សន៍ NEO Surveyor ចាប់បាន។ ដូច្នេះហើយសូម្បីតែអាចម៍ផ្កាយពណ៌ខ្មៅងងឹតដូចជាដុំធ្យូង ក៏នឹងមិនអាចលាក់បាំងពីភ្នែកតេឡេទស្សន៍បានដែរ។

អង្គការណាសាបានអនុម័តដាក់ NEO Surveyor សម្រាប់ដំណាក់កាលអភិវឌ្ឍន៍បន្ទាប់ ដោយផ្លាស់ចេញពីដំណាក់កាលគំនិតទៅដំណាក់កាលរចនា ដែលផ្នែកលម្អិតនៃការរចនានិងហាដវែររបស់វានឹងត្រូវបានបង្កើត។ ប្រសិនបើអ្វីៗទាំងអស់ត្រូវបានអនុវត្តតាមផែនការ តេឡេទស្សន៍នេះនឹងត្រូវដាក់ឱ្យដំណើរការនៅដើមឆ្នាំ2026។

តេឡេទស្សន៍ NEO Surveyor គួរតែអាចចាប់ផ្តើមការពារផែនដីបានក្នុងរយៈពេល10ឆ្នាំដំបូងរបស់វានៅក្នុងលំហ៕