អត់ដកថយងាយៗទេ! ម្ចាស់ក្រុមហ៊ុន Spotify គ្រោងនឹងដាក់សំណើទិញយក Arsenal លើកទី២ដោយបន្ថែមទឹកប្រាក់ដល់ទៅ...

អង់គ្លេស៖ លោក Daniel Ek ដែលជាម្ចាស់ក្រុមហ៊ុន Spotify នឹងដាក់សំណើទិញយកក្លិបកាំភ្លើងធំ Arsenal ជាលើកទី២បន្ទាប់ពីលើកទី១គឺ លោក Stan Kroenke បានបដិសេធមិនព្រមលក់។

លើកទី២នេះ Ek គ្រោងនឹងតំលើងតម្លៃលើសពី២កោដផោន(ស្មើនឹងប្រមាណ២.៨កោដដុល្លារ) ឯណោះដើម្បីបញ្ចុះបញ្ចូលឲ្យ លោក Kroenke ព្រមបន្ទន់ចិត្តលក់ Arsenal មកឲ្យលោក។

កាលលើកទី១ Daniel Ek បានស្នើទឹកប្រាក់តែ ១.៨កោដផោន(ស្មើនឹងប្រមាណ ២.៥កោដដុល្លារ) តែប៉ុណ្ណោះ។យ៉ាងណាមិញ Ek នៅតែបន្តតាំងគោលជំហរចង់បាន Arsenal ដែលជាក្លិបលោកស្រឡាញ់តាំងពីក្មេងៗ។

គេមិនទាន់ដឹងនៅឡើយទេថា Stan Kroenke ព្រមទទួលយកសំណើទឹកប្រាក់ដ៏មហាសាលនេះឬអត់ខណៈដែល Ek បានអូសទាញឲ្យលោក Theirry Henry, Denis Bergkamp និង Patrick Vieira ឲ្យចូលរួមជាមួយគម្រោងរបស់លោក។

គួរបញ្ជាក់ផងដែរថារឿងរ៉ាវនាំឲ្យមានការដាក់សំណើទិញដូរនេះគឺមកពីលោក  Kroenke បានអនុញ្ញាតឲ្យ Arsenal ចូលលេងនៅក្របខណ្ឌ European Super League ដែលបង្កើតឡើងដោយ Florentino Perez តែមិនដល់ពីរថ្ងៃក្រោយមក ក្លិបក៏ប្រកាសដកខ្លួនចេញដោយសារតែអ្នកគាំទ្រមកតវ៉ាដល់ខាងមុខកីឡដ្ឋាន Emirates ។

លើសពីនេះទៅទៀត អ្នកគាំទ្រក៏បានចងកំហឹងនឹងម្ចាស់ក្លិប Arsenal ជាខ្លាំងទើបទាមទារឲ្យលោកលក់ក្លិបនេះទៅឲ្យអ្នកផ្សេង ដូច្នេះទើប Daniel Ek ដាក់សំណើទិញយកតែម្ដង៕

ប្រភព៖ metro