Chelsea ខំស្នើលុយដល់៦០លានតែ Inter Milan បែរជាបដិសេធមិនលក់តារាឆ្នើមរូបនេះ

អង់គ្លេស៖ ក្លិបតោខៀវ Chelsea បានស្នើទិញយកខ្សែការពារ Achraf Hakimi ពី Inter Milan ក្នុងតម្លៃដល់ទៅ ៦០លានអឺរ៉ូ(ស្មើនឹងប្រមាណ៧៣.១លានដុល្លារ) ប៉ុន្តែ Inter Milan បានបដិសេធសំណើនោះដោយមិនស្រណោះ។

កីឡាករវ័យ២២ឆ្នាំរូបនេះបានចាកចេញពី Real Madrid ដោយផ្ទេរមក Inter Milan កាលពីឆ្នាំមុន និងបានក្លាយជាតារាឆ្នើមចូលលេងយ៉ាងទៀងទាត់ក្រោមការដឹកនាំរបស់អតីតគ្រូបង្វឹក Antonio Conte នៅរដូវកាលនេះ។

ប៉ុន្តែ Inter Milan កំពុងប្រឈមនឹងវិបត្តិហិរញ្ញវត្ថុដោយសារជំងឺកូវីដ ដូច្នេះហើយទើបក្លិបត្រូវចាំបាច់ដាក់លក់គេខណៈដែលក្លិបពីរដូចជា Chelsea និង Paris Saint-Germain ចាប់អារម្មណ៍ចង់ទិញយកគេ។

Chelsea ថែមទាំងបានស្នើទឹកប្រាក់ជាង៧៣លានដុល្លារដើម្បីនាំយក Hakimi មកទឹកដី Stamford Bridge ប៉ុន្តែ Inter Milan ទទូចចង់បាន ៨០លានអឺរ៉ូ(ស្មើនឹងប្រមាណ៩៧.៥លានដុល្លារ)ទើបព្រមលក់កីឡាករសញ្ជាតិម៉ារ៉ុកនេះ។

យោងតាមការរាយការណ៍ Chelsea ពិតជាចង់បាន Achraf Hakimi ណាស់គឺដល់ថ្នាក់ចង់ស្នើយក Emerson Palmeiri និង Andreas Christensen ឲ្យ Inter Milan ធ្វើជាផ្នែកមួយនៃសំណើដោះដូរទៀតផងស្របពេល Inter Milan ត្រូវបានគេរាយការណ៍ថាចាប់អារម្មណ៍ខ្សែការពារទាំងពីររូបនេះ៕

ប្រភព៖ metro