អីយ៉ាស់! ភ្នាក់ងាររបស់តារាឆ្នើមនៅ PL រូបនេះបានធ្វើដំណើរមក Barca ដើម្បីពិភាក្សាលើការផ្ទេរជាផ្លូវការ

អេស្ប៉ាញ៖ សារព័ត៌មាន RAC1 បានបង្ហោះរូបភាពមួយសន្លឹករបស់បុរសម្នាក់ដែលត្រូវបានគេស្គាល់ថាជាភ្នាក់ងារតំណាងឲ្យខ្សែបម្រើ Georginio Wijnaldum បានធ្វើដំណើរមកដល់ការិយាល័យនៃក្លិបអ្នកមានបុណ្យ Barcelona ដើម្បីពិភាក្សាលើការផ្ទេររបស់ Wijnaldum មកកាន់ទឹកដី Camp Nou ។

ក្នុងនោះដែរ អ្នកសារព័ត៌មានអ៊ីតាលី Fabrizio Romano ក៏បានបង្ហើបពីរឿងនេះដែរខណៈ Georginio Wijnaldum បានប្រកាសចាកចេញពី Liverpool ជាផ្លូវការ និងថែមទាំងបានធ្វើពិធីលាគ្នាជាមួយអ្នកគាំទ្រនិងមិត្តរួមក្រុមក្នុងការប្រកួតបញ្ចប់រដូវកាលទល់នឹង Crystal Palace ផងដែរ។

អ្នកកាសែត Romano ក៏បានបង្ហើបដែរថាកីឡាករសញ្ជាតិហូឡង់រូបនេះបានព្រមព្រៀងផ្ទាល់មាត់ជាមួយ ខាង Barcelona តាំងពីពីរបីថ្ងៃមុនម៉្លេះ ដោយគ្រោងនឹងចុះកុងត្រាចំនួន៣ឆ្នាំជាមួយក្លិបស្របពេល Barcelona មិនចាំបាច់ចំណាយលើថ្លៃខ្លួនរបស់គេនោះឡើយ។

គួរបញ្ជាក់ផងដែរថា កន្លងមក Liverpool ព្យាយាមស្នើកុងត្រាថ្មីដល់ Wijnaldum ប៉ុន្តែកីឡាកររូបនេះបានបដិសេធ និងជ្រើសរើសយកការចាកចេញ។ ម្យ៉ាងទៀតគេចង់ផ្ទេរមកលេងក្រោមការដឹកនាំរបស់លោកគ្រូបង្វឹក Ronald Koeman ដែលជាអតីតគ្រូនៅជម្រើសជាតិហូឡង់។

Georginio Wijnaldum ផ្ទេរពីក្លិប Newcastle មកកាន់ Liverpool កាលពីឆ្នាំ២០១៦ និងបានរួមចំណែកជួយក្រុមលើកពាន Champions League និង Premier League ផងដែរ។ក្នុងនោះគេបានបង្ហាញខ្លួន២៣៧ប្រកួត ស៊ុតបញ្ចូលទីបាន២២គ្រាប់និង បញ្ជូនបាល់ចំនួន១៦គ្រាប់៕

ប្រភព៖ caughtoffside

Join us📲 : https://t.me/keylatop  ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប់