អ៊ីចឹងសោះ!ការពិត Aguero មិនចង់ចាកចេញពី Man City ទេតែដោយសារម្នាក់នេះទើបគេសុខចិត្តលាទាំងអាល័យ

អង់គ្លេស៖ យោងតាមការរាយការណ៍ពីប្រភពមួយគឺ ខ្សែប្រយុទ្ធ Sergio Aguero មិនបានមានគំនិតចង់ចាកចេញពីក្លិបមេឃខៀវ Manchester City នោះឡើយតែមកពីលោកគ្រូបង្វឹក Pep Guardiola គិតថាវាគួរតែដល់ពេលហើយដែលកីឡាករវ័យ៣២ឆ្នាំរូបនេះបញ្ចប់អាជីពនៅទឹកដី Etihad ។

Aguero ក៏ត្រូវបានគេរាយការណ៍ពីសារព័ត៌មាន The Athletic ថាគេមិនសប្បាយចិត្តនឹង Pep នោះឡើយហើយនៅកំលុងខែមីនា ពួកគេទាំងពីរនាក់មិនបាននិយាយរកគ្នាជាច្រើនសប្តាហ៍ទៀតផងដោយសារ Aguero មានការអាក់អន់ចិត្តដែលគ្រូមិនផ្ដល់ឱកាសឲ្យចូលលេងទាំងដែលគេជាពីរបួសហើយ។

យ៉ាងណាមិញ គ្រូសិស្សមួយគូនេះនៅតែឱបគ្នាក្នុងពិធីលា Aguero ជាផ្លូវការក្រោយការប្រកួតជាមួយ Everton បានបញ្ចប់ ដែលធ្វើឲ្យដឹងថា Aguero និង Pep បានផ្សះផ្សាគ្នាវិញហើយ។

ឆ្លៀតក្នុងឱកាសនោះ លោកគ្រូបង្វឹកសញ្ជាតិអេស្ប៉ាញរូបនេះក៏បានរលីងរលោងទឹកភ្នែកពេលថ្លែងដល់វីរភាពរបស់ Sergio Aguero និងនិយាយថា Man City ពិតជាមិនអាចរកអ្នកមកជំនួសខ្សែប្រយុទ្ធឆ្នើមដូចគេនោះឡើយ។

គួររម្លឹកផងដែរថា ខ្សែប្រយុទ្ធ Sergio Aguero ផ្ទេរពី Atletico Madrid មកកាន់ Manchester City តាំងពីឆ្នាំ២០១១ រហូតមកដល់បច្ចុប្បន្ន និងបានក្លាយជាខ្សែប្រយុទ្ធរកគ្រាប់បាល់បានច្រើនបំផុតឲ្យក្លិប៕

ប្រភព៖ mirror

Join us📲 : https://t.me/keylatop  ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប