ទីបំផុតក្លិប Santos Laguna បានឡើងទៅជួបក្លិប Cruz Azul ក្នុងវគ្គផ្តាច់ព្រ័ត្រ Liga MX ដោយជោគជ័យ

ម៉ិកស៊ិច៖ ក្លិប Santos Laguna បានឡើងទៅកាន់វគ្គផ្តាច់ព្រ័ត្រក្របខណ្ឌ Liga MX Clausura កាលពីថ្ងៃអាទិត្យបើទោះបីចាញ់ ១-០ នៅក្រោមថ្វីជើងក្លិប Puebla ក្នុងជើងទី ២ នៃវគ្គពាក់កណ្តាលផ្តាច់ព្រ័ត្រក៏ដោយ។

កីឡាករ​ Santiago Ormeno បានជួយឱ្យក្រុមម្ចាស់ផ្ទះនាំមុខនៅនាទីទី ៥៤ ប៉ុន្តែក្លិប Santos Laguna នៅតែមានសង្ឃឹមច្រើនដោយសារតែបានឈ្នះជើងទី ១ ក្នុងលទ្ធផល ៣-០ រួចហើយលើក្រុមម្ចាស់ផ្ទះ​។

ក្រុមរបស់លោក Guillermo Almada នឹងត្រូវប៉ះជាមួយក្លិប Cruz Azul នៅវគ្គផ្តាច់ព្រ័ត្រដែលនឹងត្រូវប្រកួតពីរជើងគឺនៅថ្ងៃទី ២៧ និង ៣០ ឧសភាខាងមុខនេះ។

លោក Almada បានប្រាប់អ្នកយកព័ត៌មានថា៖ “ខ្ញុំចង់បានលទ្ធផលខុសគ្នានៅថ្ងៃនេះប៉ុន្តែយើងបានកក់កៅអីមួយរួចទៅហើយនៅវគ្គផ្តាច់ព្រ័ត្រដែលយើងចង់បាន”។

លោក Almada បានបន្ថែមថា "យើងមានទំនុកចិត្តច្រើន ហើយប្រសិនបើនៅពេលណាមួយយើងខ្វះអ្វីមួយ យើងដឹងថាយើងនឹងមានការប្តេជ្ញាចិត្តនិងភាពក្លាហានរបស់យើង។ យើងគោរពក្រុម Cruz Azul ប៉ុន្តែខ្ញុំក៏មានជំនឿលើកីឡាកររបស់យើងដែរ។ យើងនឹងរៀបចំខ្លួនដោយភាពរីករាយ និងទំនុកចិត្ត"។

គួររំលឹកផងដែរថា ក្លិបCruz Azul ទទួលបានកៅអី ១ រួចទៅហើយដើម្បីឡើងទៅវគ្គផ្តាច់ព្រ័ត្រកាលពីថ្ងៃសៅរ៍ដោយបញ្ចប់ការទទួលជ័យជម្នះ ១-០ លើក្រុម Pachuca នៅវគ្គពាក់កណ្តាលផ្តាច់ព្រ័ត្រ៕

ប្រភព៖ Xinhua News