អង់គ្លេស៖ ខ្សែប្រយុទ្ធ Gareth Bale ដែលកំពុងលេងខ្ចីជើងនៅ Spurs កំពុងពិចារណាចូលនិវត្តន៍ពីពិភពបាល់ទាត់ខណៈដែលរដូវកាលក្រោយ គេនឹងត្រូវត្រឡប់ទៅ Real Madrid វិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករសញ្ជាតិវែលល៍រូបនេះនៅសល់កុងត្រា១ឆ្នាំទៀតនៅទឹកដី Santiago Bernabeu ហើយទំនងជាមិនបន្តស្នាក់នៅ ក្លិបមាន់ខ្នាយមាស Tottenham Hotspur ថែមមួយរដូវកាលទៀតឡើយ ហើយយោងតាមសារព័ត៌មាន AS គឺ Bale ផ្ទេរមកលេងនៅ Spurs ក៏ដោយសារចង់មានឈ្មោះក្នុងបញ្ជីក្រុមជម្រើសជាតិវែលល៍សម្រាប់ព្រឹត្តិការណ៍ Euro នៅខែមិថុនាខាងមុខនេះឯង។
ដូច្នេះក្រោយចប់កុងត្រាជាមួយ Real Madrid នៅដំណាច់រដូវកាលក្រោយ កីឡាករវ័យ៣១ឆ្នាំរូបនេះចង់ចូលនិវត្តន៍តែម្ដងដោយសារបញ្ហាកាយសម្បទារបស់គេហាក់មិនសូវអំណោយផលដូចមុនក្រោយឆ្លងកាត់ការរងរបួសរាប់មិនអស់ទាំងនៅ Real Madrid និង នៅ Spurs និងរត់មិនសូវលឿនដូចមុន ហើយគេបានមកហ្វឹកហាត់តែបីដងប៉ុណ្ណោះក្នុងមួយសប្តាហ៍ និងថែមទាំងបាននិយាយជាមួយគ្រូបង្វឹកទាំងតាំងពីពេល Jose Mourinho នៅដឹកនាំ និងបន្តរហូតមកដល់ Ryan Mason ថាគេមិនមានសមត្ថភាពលេងបីប្រកួតក្នុងមួយសប្តាហ៍នោះឡើយ។
លោកគ្រូបង្វឹក Ryan Mason បានចេញមុខនិយាយដោយផ្ទាល់ក្រោយចប់ការប្រកួតទល់នឹង Aston Villa ថា Bale ជាអ្នកស្នើសុំមិនចូលលេងដោយខ្លួនឯង ព្រោះកាយសម្បទាមិនសូវរឹងមាំ។
គួររម្លឹកផងដែរថា ខ្សែប្រយុទ្ធ Gareth Bale ចាប់ផ្ដើមអាជីពជាកីឡាករបាល់ទាត់នៅក្លិប Southampton នាឆ្នាំ១៩៩៩ ដោយលេងនៅឈុតយុវជនហើយនៅឆ្នាំ២០០៦ គេក៏បានឡើងមកលេងឈុតធំ។ ដោយឡែក Spurs បានទិញយកគេកាលពីឆ្នាំ២០០៧ ហើយនៅឆ្នាំ២០១៣ កីឡាកររូបនេះបានចូលរួមជាមួយ Real Madrid និងទើបតែត្រឡប់មកលេងខ្ចីជើងនៅ Spurs កាលពីឆ្នាំ២០២០កន្លងទៅ៕
ប្រភព៖ thesun
Join us📲 : https://t.me/keylatop ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប