Neymar និយាយចំៗថា ក្លិប Barcelona គ្មានលទ្ធភាពបើកប្រាក់ខែឱ្យខ្លួន ដូចក្លិប PSG ទេ

បរទេស៖ ក្លិប Barcelona មានអារម្មណ៍ថាត្រូវបាន Neymar ប្រើប្រាស់ ទោះបីជាមានការខិតខំប្រឹងប្រែងដ៏ល្អបំផុតរបស់ពួកគេដើម្បីបញ្ចុះបញ្ចូលឱ្យគាត់វិលត្រឡប់ទៅទឹកដី Camp Nou វិញ ថ្មីៗនេះប្រេស៊ីលបានបន្តកិច្ចសន្យាថ្មីនៅឯ Paris Saint-Germain រហូតដល់ឆ្នាំ ២០២៥ ។

ក្លិបបាល់ទាត់កាតាឡានបានបញ្ជូនអ្នកតំណាងទៅរដ្ឋធានីបារាំង ដើម្បីនិយាយជាមួយអតីតកីឡាកររបស់ពួកគេ ប៉ុន្តែឥឡូវនេះគាត់នឹងបន្តការស្នាក់នៅឯទឹកដី Parc des Princes ។ វាត្រូវបានបង្ហើបថា មូលហេតុចម្បងនៃការបន្តរបស់លោកគឺ លោកមានជំនឿជឿជាក់ទាំងស្រុងលើការប្តេជ្ញាចិត្តរបស់ក្លិបក្នុងការវិនិយោគលើក្រុម ខណៈដែលពួកគេបន្តស្វែងរកជ័យជំនះនៅក្នុងក្របខ័ណ្ឌ Champions League ។ ដោយបានចាញ់នៅក្នុងវគ្គពាក់កណ្តាលផ្តាច់ព្រ័ត្ររដូវកាលនេះ និងវគ្គផ្តាច់ព្រ័ត្រកាលពីឆ្នាំមុន Neymar សប្បាយចិត្តជាមួយនឹងការរីកចម្រើនដែលពួកគេបានធ្វើ។

យ៉ាងណាមិញ មូលហេតុមួយទៀតគឺហិរញ្ញវត្ថុ គាត់ដឹងថា PSG គឺជាក្លិបមួយក្នុងចំណោមក្លិបតិចតួចបំផុតដែលអាចមានលទ្ធភាពបង់ប្រាក់ខែ ៣០ លានអឺរ៉ូដែលជាអ្វីដែល Barcelona មិនអាចធ្វើបាន។ Neymar និងក្រុមគ្រួសារពេញចិត្តនឹងការផ្តល់ជូននេះ ហើយកីឡាកររូបនេះក៏សង្ឃឹមថា Kylian Mbappe នឹងដើរតាមគន្លងរបស់គាត់និងបន្តកិច្ចសន្យាជាថ្មីទៀតផងដែរ៕