ប្រពៃណាស់! ពូដូផ្ញើជូនរបស់ពិសេសមួយដល់ក្មេងម្នាក់ខណៈគេកំពុងព្យាបាលជំងឺ

អឺរ៉ុប៖ អ្នកប្រើប្រាស់កម្មវិធី Reddit បានបង្ហោះរូបភាពមួយសន្លឹកដែលមានអាវរបស់ ខ្សែប្រយុទ្ធ Cristiano Ronaldo ដែលមានហត្ថលេខាលើនោះចែកជូនអ្នកប្រើប្រាស់បណ្ដាញសង្គមអ៊ីនធើណេត ដែលគេដឹងថា អាវនោះជាអាវដែល Ronaldo បានផ្ញើទារកអាយុ ៦ខែ ឈ្មោះ Gavrilo Djurdjevic និងក្រុមគ្រួសាររបស់គេ។

Ronaldo បានផ្ញើអាវដោយមានហត្ថលេខាភ្ជាប់ជាមួយ សំបុត្រមួយដែលមានពាក្យថា "អ្នកជាវីរបុរសម្នាក់" ព្រមទាំង "នេះជាជ័យជំនះរបស់ Gavrilo" ផងដែរ។

ហេតុផលដែល កំពូលខ្សែប្រយុទ្ធរូបនេះផ្ញើកាដូដ៏ពិសេសនេះទៅឲ្យGavrilo នោះក៏ដោយសារគេត្រូវព្យាបាលជំងឺស្ពឹកសាច់ដុំ ហើយប្រាក់ដែលយកមកព្យាបាលគឺបានពីការដាក់ដេញថ្លៃ ស្លាកប្រធានក្រុមជម្រើសជាតិព័រទុយកាល់ ដែល Ronaldo បានគ្រវែងចោល កាលពីប្រកួតជម្រុះបាល់ទាត់ពិភពលោក ទល់នឹងប្រទេស ស៊ែប៊ី នាកំលុងខែមីនានោះឯង។

កាលណោះ Cristiano Ronaldo ខឹងដែលស៊ុតបញ្ចូលទីហើយតែអាជ្ញាកណ្ដាលសម្រេចមិនផ្ដល់គ្រាប់បាល់ឲ្យ ទើបគេមួម៉ៅ គ្រវែងស្លាកប្រធានក្រុមចោល និងដើរចេញពីទីលាន ហើយយោងតាមការរាយការណ៍គឺ ស្លាកប្រធានក្រុមនោះត្រូវអ្នកមើលថែកីឡដ្ឋានឈ្មោះ Djordje Vukicevic រើសយកមកដាក់ដេញថ្លៃបានប្រាក់ខ្ទង់ ៥ម៉ឺន៤ពាន់ផោន(ស្មើនឹងប្រមាណ៧ម៉ឺន៥ពាន់ដុល្លារ)ហើយលុយនោះក៏ធ្លាក់មកដល់ដៃគ្រួសាររបស់ Gavrilo ដើម្បីយកមកព្យាបាលជំងឺតែម្ដង។

ដូច្នេះហើយទើប ខ្សែប្រយុទ្ធ Ronaldo បានផ្ញើអាវឲ្យ Gavrilo ដើម្បីជាកម្លាំងចិត្តឲ្យគេឆាប់ជាសះស្បើយ៕

ប្រភព៖ caughtoffside

ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖
https://t.me/khmerload