ទីបំផុតលោក Mourinho ទៅដឹកនាំក្លិបនៅអ៊ីតាលី Serie A មួយនេះនៅរដូវកាលក្រោយ បន្ទាប់ពីចែកផ្លូវជាមួយក្លិប Tottenham

ទីក្រុងរ៉ូម៖ ក្លិបនៅក្របខណ្ឌអ៊ីតាលី Serie A បានប្រកាសតែងតាំងលោក Jose Mourinho ជាគ្រូបង្វឹកក្លិប Roma នៅរដូវកាលក្រោយ ដែលបានធ្វើឡើងកាលពីថ្ងៃអង្គារនៅប៉ុន្មានម៉ោងបន្ទាប់ពីក្លិបនេះបានសម្រេចចិត្តចែកផ្លូវជាមួយអ្នកចាត់ការបច្ចុប្បន្នគឺលោក Paulo Fonseca នៅចុងបញ្ចប់នៃរដូវកាលនេះ។

លោក Fonseca បានចុះកុងត្រារយៈពេល ២ ឆ្នាំជាមួយក្លិប Roma កាលពីរដូវក្តៅឆ្នាំ ២០១៩ ប៉ុន្តែដោយសារតែលទ្ធផលនៃការដឹកនាំមិនសូវល្អនៅរដូវកាលបច្ចុប្បន្នភាគីទាំងសងខាងមិនមានចេតនាចង់បន្តកុងត្រានោះទៀតទេ។

មុនពេលចុះកុងត្រាជាមួយក្លិប Roma មិត្តរួមជាតិរបស់លោក Fonseca គឺលោក Mourinho បានលាឈប់ពីក្លិប Tottenham Hotspur របស់ក្របខ័ណ្ឌ Premier League រួចហើយ។ ក្លិប Roma បានបញ្ជាក់ថាបុរសវ័យ ៥៨ ឆ្នាំរូបនេះបានចុះកិច្ចសន្យា ៣ ឆ្នាំហើយនឹងចាប់ផ្តើមតួនាទីថ្មីរបស់គាត់មុនយុទ្ធនាការប្រគួតឆ្នាំ ២០២១-២២ ។

ប្រធានក្លិបលោក Dan Friedkin និងអនុប្រធានក្លិបលោក Ryan Friedkin បានមានប្រសាសន៍ថា "យើងមានសេចក្តីសោមនស្សរីករាយនិងរីករាយណាស់ដែលបានស្វាគមន៍លោក Jose Mourinho ចូលមកកាន់ក្នុងគ្រួសារ AS Roma ពួកយើង"។

"ជើងឯកដ៏អស្ចារ្យម្នាក់ដែលបានឈ្នះពានរង្វាន់នៅគ្រប់កម្រិតលោក Mourinho នឹងផ្តល់នូវភាពជាអ្នកដឹកនាំនិងបទពិសោធន៍ដ៏អស្ចារ្យដល់គម្រោងប្រកបដោយមហិច្ឆតារបស់យើង"។ "ការតែងតាំងលោក Mourinho គឺជាជំហានដ៏ធំមួយក្នុងការកសាងវប្បធម៌ឈ្នះយូរអង្វែងនិងខ្ជាប់ខ្ជួននៅទូទាំងក្លិប" ។

ក្នុងនាមជាគ្រូបង្វឹកម្នាក់ដែលទទួលបានជោគជ័យបំផុតក្នុងប្រវត្តិសាស្ត្របាល់ទាត់លោក Mourinho បានឈ្នះពានរង្វាន់ធំៗចំនួន ២៥ ក្នុងអាជីពរបស់លោករហូតមកដល់បច្ចុប្បន្ន។ ហើយការត្រឡប់មកកាន់អ៊ីតាលីលើកនេះមិនមែនជារឿងថ្មីសម្រាប់គាត់ទេព្រោះថាគ្រូបង្វឹកសញ្ជាតិព័រទុយហ្គាល់រូបនេះធ្លាប់ទទួលបានការចាប់អារម្មណ៍យ៉ាងខ្លាំងម្ដងរួចមកហើយនៅឯក្លិប Inter Milan កាលពីឆ្នាំ ២០០៨ ដល់ឆ្នាំ ២០១០ ដែលនាំឱក្លិប Inter Milan ឈានទៅរកភាពអស្ចារ្យ៕

ប្រភព៖ Xinhua News