Messi​ និងមិត្តរួមក្រុមកំពុងត្រូវបាន La Liga សេុីបអង្កេតជុំវិញការជួបជុំមួយនៅផ្ទះរបស់ Messi

អេស្ប៉ាញ៖ កីឡាករខ្សែប្រយុទ្ធសញ្ជាតិអាហ្សង់ទីន Lionel Messi​ និងកីឡាកររបស់ក្រុមអ្នកមានបុណ្យ FC Barceolna ជាច្រើនរូបកំពុងត្រូវ​បាន La Liga ដាក់ការសេុីបអង្កេតមួយជុំវិញការជួបជុំមួយក្នុងពិធីជប់លៀងនៅក្នុងផ្ទះរបស់កីឡាករ Lionel Messi។

អាជ្ញាធររបស់ប្រទេសអេស្ប៉ាញត្រូវបានគេដឹងថាកំពុងតែធ្វើការស្វែងរក និងសេុីបអង្កេតទៅលើការរំលោភបម្រាមផ្សេងៗស្តីអំពីការប្រមូលផ្តុំគ្នាដែលបានដាក់ចេញក្នុងការទប់ស្កាត់នឹងជំងឺឆ្លងជំងឺកូវីដ១៩ ពីសំណាក់កីឡាករជាច្រើនរូបរបស់ក្រុម FC Barcelona ។ ហេតុនេះហើយទើបកីឡាករ Lionel Messi និង​មិត្តរួមក្រុមរបស់គាត់កំពុងស្ថិតក្រោមការស៊ើបអង្កេតដោយ La Liga សម្រាប់ការជួបជុំអាហារថ្ងៃត្រង់នៅឯផ្ទះរបស់ប្រធានក្រុមរូបនេះនៅដើមសប្តាហ៍នេះ។

គួរបញ្ជាក់ផងដែរថា កីឡាករសញ្ជាតិអាហ្សង់ទីន Lionel Messi បានរៀបចំការប្រជុំក្រុមមួយនៅឯគេហដ្ឋានរបស់គាត់នៅ Castelldefels កាលពីថ្ងៃច័ន្ទដើម្បីចាប់ផ្តើមការត្រៀមសំរាប់ការប្រកួតនៅចុងសប្តាហ៍នេះជាមួយក្រុម Atletico Madrid ប៉ុន្តែឥលូវនេះកីឡាករជាច្រើនអាចនឹងរងនូវការដាក់ទណ្ឌកម្មប្រសិនបើពួកគេត្រូវបានរកឃើញថាមានកំហុសពីការប្រព្រឹត្តខុសច្បាប់ចំពោះបម្រាមរបស់អាជ្ញាធរ៕