ក្លិប Tottenham កំពុងតាមប្រមាញ់ខ្សែប្រយុទ្ធសញ្ជាតិប្រេស៊ីល Varanda ទៅចូលរួមជាមួយខ្លួន

ប្រេស៊ីល៖ យោងតាមសេចក្តីរាយការណ៍របស់សារព័ត៌មានប្រេស៊ីលបាន ឲ្យដឹងថាក្លិប Tottenham Hotspur កំពុងរៀបចំសំណើរដើម្បីចុះហត្ថលេខាលើកីឡាករវ័យក្មេង Rodrigo Varanda របស់ក្លិប Corinthians ។

បើយោងតាមការចុះផ្សាយរបស់សារព័ត៌មាន Gazeta Esportiva កាលពីថ្ងៃអាទិត្យ ក្លិបនៅក្របខណ្ឌ English Premier League បានធ្វើការសាកសួររួចហើយអំពីកីឡាករវ័យ ១៨ ឆ្នាំរូបនេះហើយសុខចិត្តចំណាយប្រាក់ចំនួន ៨,៥ លានអឺរ៉ូ (១០ លានដុល្លារអាមេរិក) ដើម្បីនាំគាត់ទៅកាន់ក្លិបដែលមានមូលដ្ឋាននៅភាគខាងជើងទីក្រុងឡុងដ៍។

កិច្ចសន្យាបច្ចុប្បន្នរបស់កីឡាករ Varanda នឹងផុតកំណត់នៅខែមករាឆ្នាំក្រោយ ប៉ុន្តែក្លិប Corinthians ត្រូវបានគេដឹងថាកំពុងបន្តការចរចាដើម្បីធានាថាកីឡាកររូបនេះមិនត្រូវបានផ្ទេរដោយឥតគិតថ្លៃនោះទេ។

ជាខ្សែប្រយុទ្ធដែលមានសមត្ថភាពខ្ពស់ កីឡាករ Varanda តែងតែបានបង្ហាញខ្លួនក្នុងចំណោមកីឡាករជម្រើស ១០ ដំបូងសម្រាប់ក្រុមយក្សរបស់ប្រេស៊ីល Serie A ចាប់តាំងពីត្រូវបានជ្រើសរើសចេញពីក្រុមយុវជនរបស់ពួកគេកាលពីខែមករា។

បច្ចុប្បន្នក្លិប Spurs មានកីឡាករប្រេស៊ីល ២ រូបក្នុងជម្រើសដំបូងរបស់ពួកគេគឺខ្សែបម្រើ Lucas Moura និងខ្សែប្រយុទ្ធ Carlos Vinicius ដែលកំពុងខ្ចីជើងពីក្លិប Benfica ៕

ប្រភព៖ Xinhua News