អង់គ្លេស៖ កាលពីថ្ងៃទី២៨ កន្លងទៅនេះ ក្លិបអធិរាជស Real Madrid បានបើកទ្វារកីឡដ្ឋានស្វាគមន៍ក្រុមភ្ញៀវ តោខៀវ Chelsea មកពីអង់គ្លេស ក្នុងជំនួបវគ្គពាក់កណ្ដាលផ្ដាច់ព្រ័ត្រក្របខណ្ឌ Champions League ដោយលទ្ធផលនៃការប្រកួតគឺ Chelsea លេងបានស្មើ ១ ទល់នឹង ១ ជាមួយ Real Madrid ។
ខ្សែបម្រើ Christian Pulisic រកបាន១គ្រាប់នៅនាទីទី១៤ ប៉ុន្តែខ្សែប្រយុទ្ធ Karim Benzema ក៏រកបាន១គ្រាប់តាមស្មើវិញនៅនាទីទី២៩ និងរក្សាលទ្ធផលនោះរហូតចប់ការប្រកួត។
ប៉ុន្តែយ៉ាងណាមិញ អ្វីដែលគេកត់សម្គាល់នោះគឺ ខ្សែប្រយុទ្ធ Timo Werner បានខកខានឱកាសស៊ុតបញ្ចូលទីម្ដងទៀតហើយគឺនៅនាទីទី៤១ កីឡាករសញ្ជាតិបអាល្លឺម៉ង់រូបនេះបានបណ្ដើរបាល់ទៅកាន់ប្រអប់គ្រោះថ្នាក់របស់ Real Madrid តែម្នាក់ឯងខណៈខ្សែការពារ Raphael Varane ព្យាយាមរត់មករារាំងតែ Werner សម្រេចចិត្តស៊ុតមួយជើងស្តាំពីចម្ងាយតែបាល់នោះមិនចូលទីនោះឡើយដែលធ្វើឲ្យបង្កក្ដីខកចិត្តដល់អ្នកគាំទ្រជាខ្លាំង។
ឃើញដូច្នេះ លោកគ្រូបង្វឹក Thomas Tuchel បានបង្ហើបថា នេះមិនមែនជាលើកទី១ទេដែល Werner ខកខានឱកាសមាសឱកាសប្រាក់បែបនេះ និងថា Werner ប្រហែលកំពុងខឹងនឹងខ្លួនឯងដែលស៊ុតមិនចូលទី។
លោកគ្រូបានថ្លែងថា៖
គេ(Timo Werner) បានខកខានឱកាសស៊ុតទល់នឹង West Ham ម្ដងហើយ ឥលូវនេះគេខកខានម្ដងទៀត ហើយនោះវាពិតជាមើលទៅមិនល្អនោះឡើយ។ ប៉ុន្តែអ្នកមិនគួរយំស្រែកឬសោកស្តាយរាល់ពេលនោះឡើយ។ ខ្ញុំគិតថាកីឡាគឺមានលក្ខណៈពិសេសមួយគឺគេខ្វល់តែអ្នកបានធ្វើអីនៅថ្ងៃនេះតែថ្ងៃស្អែក គេនឹងភ្លេចអ្វីដែលអ្នកបានធ្វើ។ គេប្រហែលជាខកចិត្តនិងខឹងខ្លួនឯងណាស់ដែលខកខានឱកាសស៊ុតបញ្ចូលទីបែបនេះ ប៉ុន្តែនៅថ្ងៃស្អែក គេត្រូវតែងើយមុខឡើង។ គេជាកីឡាករលំដាប់កំពូល គេបានប្រឹងប្រែងណាស់។ ខ្ញុំគិតថាគ្រប់គ្នានឹងរៀនទទួលយកស្ថានការណ៍បែបនេះបាន ការដែលមាននាមដែលខ្សែប្រយុទ្ធគឺបើសិនអ្នកស៊ុតបញ្ចូលទីបាននៅការប្រកួតបន្ទាប់ នោះនឹងគ្មានអ្នករិះគន់អ្នកទៀតឡើយ។
Timo Werner ទើបតែស៊ុតបញ្ចូលទីបាន១គ្រាប់គត់ក្នុងការបង្ហាញខ្លួន១៣ប្រកួតចុងក្រោយមកនេះដែលធ្វើឲ្យតំណែងជាខ្សែប្រយុទ្ធរបស់គេកំពុងក្ដៅ ព្រោះ Tammy Abraham និង Olivier Giroud ក៏អាចបំពេញតួនាទីនេះបានដែរ៕
ប្រភព៖ metro
ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖
https://t.me/khmerload
Bong I.T