អង់គ្លេស៖ ខ្សែការពារ Eric Bailly បានបន្តកុងត្រាថ្មីជាមួយក្លិបបិសាចក្រហម Manchester United ជាផ្លូវការហើយ ដោយកគេនឹងស្នាក់នៅទឹកដី Old Trafford រហូតដល់ឆ្នាំ២០២៤ ។
ថ្មីៗនេះមានពាក្យចចាមអារ៉ាមជាច្រើនថា កីឡាកររូបនេះមិនបន្តកុងត្រាថ្មីឡើយដោយសារខឹងលោកគ្រូបង្វឹក Ole Gunnar Solskjaer មិនសូវដាក់ឲ្យចូលលេង ប៉ុន្តែពេលនេះរូបគេមានជំនឿជាក់ព្រោះក្លិបបានប្រាប់គេថាគេនៅមានតំណែងអាចចូលលេងជម្រើស១១នាក់ដំបូងបាន។
កុងត្រារបស់ Bailly នឹងអស់សុពុលភាពនៅចុងបញ្ចប់រដូវកាលនេះហើយ ខណៈដែលភ្នាក់ងាររបស់គេបានទទួលសំណើពីក្លិបផ្សេងៗជាច្រើន។ យ៉ាងណាមិញ បន្ទាប់ពីឆ្លងកាត់ការពិភាក្សាជាមួយលោកគ្រូបង្វឹក Ole Gunnar Solskjaer កីឡាករវ័យ២៧ឆ្នាំរូបនេះក៏ចាប់ផ្ដើមបង្វែរការសម្រេចចិត្តនិងព្រមព្រៀងស្នាក់នៅបន្តទៀត។
ឆ្លៀតក្នុងឱកាសនេះ Bailly បានថ្លែងប្រាប់គេហទំព័ររបស់ក្លិប Manchester United ថា៖
ខ្ញុំពិតជាសប្បាយចិត្តណាស់ ការសម្រេចចិត្តនេះជាអ្វីដែលខ្ញុំមិនបាច់គិតច្រើននោះឡើយ។ ខ្ញុំស្រឡាញ់ក្លិបនេះនិងចង់លេងឲ្យ Manchester United បន្តទៀត។ ខ្ញុំនិងគ្រួសារខ្ញុំពិតជាសប្បាយចិត្ត គ្រប់យ៉ាងមើលទៅល្អរៀបរយ។ ឥលូវនេះរបួសរបស់ខ្ញុំបានជាសះស្បើយហើយ ខ្ញុំមានអារម្មណ៍ល្អ ហើយការបន្តកុងត្រាថ្មីនេះប្រៀបដូចការប្រកួតប្រជែងថ្មីមួយសម្រាប់ខ្ញុំ ខ្ញុំបានត្រៀមខ្លួនរួចរាល់ហើយ។ ខ្ញុំសង្ឃឹមថាពួកយើងនឹងអាចលើកពាន Europa League នៅរដូវកាលនេះ ដែលវាពិតជាសំខាន់ណាស់សម្រាប់ពួកយើងនិងសម្រាប់អ្នកគាំទ្រ។ ពួកយើងក៏ចង់លេងឲ្យបានល្អនៅ Premier League ដែរ។ នៅរដូវកាលក្រោយ ខ្ញុំសង្ឃឹមថាពួកយើងនឹងបានចូលលេងនៅ Champions League ព្រមទាំងឈ្នះពាន Premier League ផងដែរ។ ខ្ញុំជឿជាក់លើមិត្តរួមក្រុមរបស់ខ្ញុំ ពួកយើងជាក្រុមល្អមួយ ក្រុមមួយនេះចង់លេងឲ្យកាន់តែល្អជាងមុន ដែលនោះជារឿងសំខាន់សម្រាប់ក្រុមនារដូវកាលក្រោយ។
Eric Bailly ផ្ទេរពី Villarreal មកកាន់ទឹកដី Old Trafford នៅរដូវក្ដៅឆ្នាំ២០១៦ និងបង្ហាញខ្លួនសរុប១៥ប្រកួតនៅរដូវកាលនេះ ក៏ដោយសារតែគេបានរងរបួស និងបានឆ្លងជំងឺកូវីដ១៩ផង ប៉ុន្តែបើគិតជារួមគឺគេលេងឲ្យក្លិបបិសាចក្រហមបាន១០០ប្រកួតហើយ៕
ប្រភព៖ dailymail
ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖
https://t.me/khmerload
Bong I.T