អង់គ្លេស៖ លោកគ្រូបង្វឹក Pep Guardiola បានកោតសរសើរក៏ដូចជានិយាយពីឥទ្ធិពលរបស់ខ្សែបម្រើ Phil Foden បន្ទាប់ពីកីឡាករវ័យក្មេងរូបនេះរកបាន១គ្រាប់រួមចំណែកជួយឲ្យក្រុមយកឈ្នះ Aston Villa ២ ទល់នឹង១ ដែលជាការប្រកួតក្នុងក្របខណ្ឌ Premier League ។
២គ្រាប់របស់ Man City រកបានដោយខ្សែបម្រើ Phil Foden បើកឆាកនៅនាទីទី២២ និង Rodri ថែមមួយគ្រាប់ទៀតនៅនាទីទី៤០ បើទោះបីជា John McGinn របស់ខាង Aston Villa បើកការនាំមុខ ដោយស៊ុតបញ្ចូលទីនៅនាទីទី១ ក៏ដោយ។
ក្នុងការប្រកួតនេះដែរ ខាងក្រុមទាំងពីរសុទ្ធតែលេងដោយកីឡាករ១០នាក់ ក្រោយលោកអាជ្ញាកណ្ដាលបណ្ដេញ John Stones នៅនាទីទី៤៤ ក្រោយព្យាយាមប្រទាញប្រទង់ Ramsey និង Matty Cash ក៏ទទួលបានកាតក្រហមនៅនាទីទី៥៧ដែរ។
យ៉ាងណាមិញ ឥទ្ធិពលរបស់ Foden នៅក្នុងការប្រកួតនេះបានធ្វើឲ្យ Manchester City កាន់តែមានទំនុកចិត្ត ដោយនៅរដូវកាលនេះគេរកបាន១៤គ្រាប់ និងបញ្ជូនបាល់ឲ្យមិត្តរួមក្រុម៩គ្រាប់ទៀត នាំឲ្យលោកគ្រូបង្វឹក Pep Guardiola ទទួលស្គាល់ថា Foden បានក្លាយជាកីឡាករស្នូលមួយរូបប្រចាំក្រុមហើយ។
លោកគ្រូបានថ្លែងប្រាប់ Sky Sports ថា៖
ក្មេងម្នាក់នេះ(Phil Foden) កំពុងរៀនអភិវឌ្ឍខ្លួនឯងបានល្អណាស់។ គេបានជះឥទ្ធិពលដ៏ធំនៅក្នុងការប្រកួតនេះ គេបានក្លាយជាកីឡាករស្នូលម្នាក់។vឥលូវនេះ Phil គឺជាកីឡាករសំខាន់របស់យើងហើយ។ ឥទ្ធិពលរបស់គេចំពោះក្រុមក្នុងការប្រកួតបីចុងក្រោយនេះពិតជាសំខាន់ គេអាចលេងបានច្រើនតំបន់ មិនថានៅក្នុងប្រអប់គ្រោះថ្នាក់ក៏ដោយ គេពិតជាខិតខំប្រឹងប្រែងខ្លាំងណាស់។
ប្រភព៖ metro
Bong I.T