គ្រូចង់បានណាស់! Tuchel ប្រាប់ឲ្យថ្នាក់លើរបស់ Chelsea ឲ្យតាមយកកីឡាករ Real Madrid ម្នាក់នេះ

អង់គ្លេស៖ យោងតាមការរាយការណ៍ លោកគ្រូបង្វឹក Thomas Tuchel បានស្នើសុំឲ្យថ្នាក់លើរបស់ក្លិបតោខៀវ Chelsea ទិញយក ខ្សែការពារ Raphael Varane ពីក្លិប Real Madrid ។

បើទោះបីជាតំបន់ការពាររបស់ Chelsea មើលទៅរឹងមាំដោយបិទមិនឲ្យគូប្រកួតស៊ុតបញ្ចូលទីដល់ទៅ១០ប្រកួតក៏ដោយក៏លោកគ្រូTuchel នៅតែគិតថាត្រូវពង្រឹងតំបន់នេះបន្ថែមទៀតដូច្នេះ Varane គឺជាជម្រើសចម្បងគេដែលលោកគ្រូសម្លឹងឃើញ។

ម្យ៉ាងទៀតកីឡាករសញ្ជាតិបារាំងរូបនេះនឹងផុតកុងត្រាជាមួយក្លិប Real Madrid នៅចុងបញ្ចប់រដូវកាលនេះហើយ ដោយយោងតាមប្រភពមួយបានបង្ហើបថា Varane ចង់ចាកចេញមកស្វែងរកបទពិសោធន៍ថ្មី។

Real Madrid មិនចង់ឲ្យគេចាកចេញដោយគ្មានតម្លៃខ្លួននោះឡើយទើបក្លិបបានដាក់តម្លៃខ្លួនគេត្រឹម ៥១លានផោន(ស្មើនឹងប្រមាណ ៧១.២លានដុល្លារ)ប៉ុន្តែឧបសគ្គរបស់ Chelsea គឺ ក្លិបបិសាចក្រហម Manchester United ក៏ចង់បានកីឡាករវ័យ២៧ឆ្នាំនេះផងដែរ។

យោងតាមសារព័ត៌មាន Bild លោកគ្រូ Tuchel បានស្នើឲ្យ Chelsea ធ្វើអ្វីគ្រប់យ៉ាងដើម្បីទិញយកខ្សែការពាររូបនេះវ៉ាដាច់ Man UTD ឲ្យបាន ខណៈដែលក្លិបរបស់លោកគ្រូត្រូវជួបជាមួយ Real Madrid នៅវគ្គពាក់កណ្ដាលផ្ដាច់ព្រ័ត្រពាន Champions League ។

Raphael Varane សឹងតែផ្ទេរមកចូលរួមជាមួយ Manchester United កាលពីឆ្នាំ២០១១ ទៅហើយបើកុំតែ Real Madrid ទិញយកគេបានមុន ហើយចំណាយពេលជាង ១០ឆ្នាំមកនេះគឺ គេឈ្នះបាន Champions League បាន៤ដង, La Liga បីដង, Copa Del Rey និង Club World Cup ៤ដងហើយគេក៏បានលើកពានបាល់ទាត់ពិភពលោកឆ្នាំ២០១៨ ជាមួយបារាំងផងដែរ៕

ប្រភព៖ metro