គ្រូបង្វឹកម្នាក់នេះមានភាគរយខ្ពស់អាចមកដឹកនាំ Spurs ជំនួស Mourinho

អង់គ្លេស៖ លោកគ្រូបង្វឹក Julian Nagelsmann បានក្លាយជាគោលដៅអាទិភាព របស់ក្លិបមាន់ខ្នាយមាស Tottenham Hotspur ដោយក្លិបគ្រោងយករូបលោកមកឡើងកាន់តំណែងជាគ្រូបង្វឹកជំនួស Jose Mourinho ដែលត្រូវបញ្ចប់តួនាទីកាលពីយប់មិញនេះ។

បន្ទាប់ពីព័ត៌មាននេះបានប្រកាសឡើង ក្រុម Spurs ទាំងមូលត្រូវមើលថែខុសត្រូវដោយ លោកគ្រូបង្វឹក Ryan Mason និង Chris Powell ជាបណ្ដោះអាសន្នទម្រាំរកបានគ្រូបង្វឹកថ្មីស្របពេល Spurs ត្រូវប្រកួតជាមួយ Manchester City នៅ Carabao Cup វគ្គផ្ដាច់ព្រ័ត្រនៅថ្ងៃអាទិត្យសប្តាហ៍នេះហើយ។

ខណៈនោះដែរ លោកគ្រូបង្វឹក Nagelsmann ដែលកំពុងដឹកនាំ RB Leipzig ជាបេក្ខភាពគ្រូបង្វឹកដែលស័ក្តិសមនឹងដឹកនាំ Spurs ជាងគេ បើទោះបីជាលោកគ្រូកំពុងមានពាក្យចចាមអារ៉ាមថាអាចនឹងទៅដឹកនាំ Bayern Munich បន្តពី Hansi Flick ក៏ដោយ។

បន្ទាប់ពី Julian Nagelsmann គឺ Spurs សម្លឹងឃើញលោកគ្រូបង្វឹក Brendan Rodgers ដែលកំពុងដឹកនាំ Leicester City ដោយ Ledley King ដែលជាវីរបុរសរបស់ក្លិបក៏កំពុងស្ថិតក្នុងការពិចារណាដែរ។

ក្រៅពីនោះ Massimiliano Allegri, Steven Gerrard , Scott Parker,និង Rafa Benitez ក៏ស្ថិតនៅក្នុងជម្រើសរបស់ Spurs ដែរ។

លោកគ្រូបង្វឹក Jose Mourinho ត្រូវបានក្លិបបញ្ចប់តួនាទី កាលពីថ្ងៃទី១៩ ខែមេសា ម្សិលមិញនេះ ខណៈលោកបានដឹកនាំឲ្យក្រុមឈរនៅលេខរៀងទី៦ នៅរដូវកាលមុន ខណៈពេលនេះក្លិបកំពុងឈរនៅលេខរៀងទី៧៕

ប្រភព៖ metro