ចុមយក្ស! ស្ងាត់ៗ Man UTD លួចទាក់ទងទៅ Leicester ចរចាយកតារាជួរមុខម្នាក់

អង់គ្លេស៖ ក្លិបបិសាចក្រហម Manchester United ត្រូវបានគេរាយការណ៍មកថា បានទាក់ទងទៅក្លិបកញ្ជ្រោងខៀវ Leicester City ជុំវិញការចរចាផ្ទេរយក ខ្សែការពារវ័យក្មេង Wesley Fofana។

ខ្សែការពារវ័យ២០ឆ្នាំរូបនេះ បានបង្ហាញទម្រង់លេងយ៉ាងលេចធ្លោ ឲ្យ Leicester រដូវកាលនេះ ពោលគឺចាប់តាំងពីផ្លាស់ពីក្លិប Saint Etienne ក្នុងតម្លៃ៣៦,៥លានផោន (ឬប្រមាណ ៥០លានដុល្លារ) កាលពីខែសីហា ឆ្នាំមុនមក។

ជាមួយគ្នានេះ បើយោងតាមរបាយការណ៍របស់កាសែត Foot Mercato ទម្រង់លេងរបស់ខ្សែការពារសញ្ជាតិបារាំងខាងលើ បានទាក់ភ្នែកអ្នកចាត់ការក្រុម Man UTD លោក Ole Gunnar Solskjaer ។

ប្រភពដដែលបានបន្ថែមទៀតថា Man UTD បានទាក់ទងទៅ Leicester រួចរាល់ហើយ ប៉ុន្តែការចរចាហាក់មានការលំបាក ដោយសារតែក្លិបដែលមានម្ចាស់ជាមហាសេដ្ឋីជនជាតិថៃមួយនេះ ចង់បានតម្លៃខ្លួនរបស់ Fofana ប្រហាក់ប្រហែលទៅនឹងតម្លៃដែលលក់ Harry Maguire ក្នុងតម្លៃ៨០លានផោន ឲ្យក្លិបបិសាចក្រហម កាលឆ្នាំ២០១៩។

យ៉ាងណាមិញ តម្លៃដែល Leicester ទាមទារជាឧបសគ្គសម្រាប់ Man UTD ក៏ព្រោះតែក្លិបជើងឯកលីគកំពូលអង់គ្លេស២០សម័យមួយនេះ ជួបវិបត្តិហិរញ្ញវត្ថុដែលបង្កដោយជំងឺកូវីដ១៩៕