ក្លិបណាចង់បានស្តាប់ឲ្យច្បាស់! Aguero ប្រកាសទាមទារថ្លៃឈ្នួលក្នុងមួយសប្តាហ៍ចំនួន...

អង់គ្លេស៖ ខ្សែប្រយុទ្ធ Sergio Aguero នៃក្លិបមេឃខៀវ Manchester City បានទាមទារប្រាក់ឈ្នួលចំនួន ២សែនផោន (ស្មើនឹងប្រមាណ ២សែន៧ម៉ឺនដុល្លារ) ក្នុងមួយសប្តាហ៍ បើសិនក្លិបណាមួយចង់យករូបគេទៅរួមក្រុមជាមួយ។

បន្ទាប់ពីព័ត៌មាននៃការចាកចេញរបស់ Aguero ពីក្លិប Manchester City បានរីកសុះសាយ ថ្មីៗនេះក្លិបជាច្រើនដូចជា Chelsea, Barcelona, Paris Saint-Germain និង Juventus កំពុងសម្លឹងចង់ចុះកុងត្រាប្រជែងយកកីឡាករវ័យ៣២ឆ្នាំរូបនេះ។

ខ្សែប្រយុទ្ធសញ្ជាតិអាហ្សង់ទីនរូបនេះនឹងផុតកុងត្រាជាមួយ Man City នៅចុងរដូវកាលនេះហើយដែលមានន័យថាគេអាចចាកចេញដោយគ្មានតម្លៃខ្លួន ប៉ុន្តែគេមិនចង់ផ្ទេរទៅក្លិបណាដែលឲ្យថ្លៃហត់នឿយតិចជាងក្លិបចាស់នោះឡើយ ខណៈដែលនៅទឹកដី Etihad Sergio Aguero រកបានពីចន្លោះ ២សែន៣ម៉ឺនផោន (ស្មើនឹង ៣សែន១ម៉ឺនដុល្លារ) ទៅ ២សែន៦ម៉ឺនផោន(ស្មើនឹង៣សែន៥ម៉ឺនដុល្លារ)ក្នុងមួយសប្តាហ៍ឯណោះ។

យ៉ាងណាមិញ ក្លិបអ្នកមានបុណ្យ Barcelona ប្រហែលមិនអាចផ្ដល់ប្រាក់ច្រើនដល់ថ្នាក់នោះដល់ Aguero ឡើយដោយសារតែក្លិបកំពុងជួបវិបត្តិហិរញ្ញវត្ថុស្របពេល Juventus ក៏មិនខុសពីគ្នាដោយលេចឮដំណឹងថាក្លិបសេះបង្កង់នេះចង់ដាក់លក់កំពូលខ្សែប្រយុទ្ធ Cristiano Ronaldo ទៀតផង។ ដូច្នេះហើយក្លិបពីរគត់ដែលអាចផ្ដល់ប្រាក់ដល់ Aguero បានគឺ PSG និង Chelsea ។

គួរបញ្ជាក់ផងដែរថា ខ្សែប្រយុទ្ធ Sergio Aguero គឺជាកីឡាករដែលរកគ្រាប់បាល់បានច្រើនបំផុតឲ្យក្លិប Manchester City និងជាកីឡាករទី៤ដែលស៊ុតបញ្ចូលទីបានច្រើនជាងគេនៅក្នុងប្រវត្តិសាស្ត្រ Premier League ផងដែរ៕

ប្រភព៖ thesun