អង់គ្លេស៖ អ្នកគាំទ្រក្នុងបណ្ដាញសង្គមបាននាំគ្នាភ្ញាក់ផ្អើលក្រោយ គណនី Twitter របស់ខ្សែបម្រើ Phil Foden នៃក្លិបមេឃខៀវ Manchester City បានបង្ហោះសារមួយជូនដល់ ខ្សែប្រយុទ្ធ Kylian Mbappe ថា៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
@KMbappe តើអ្នកត្រៀមរួចរាល់ឬនៅ?
អ្នកគាំទ្រគិតថា Foden ដូចជាបង្ហាញពីអំណួតដោយចង់បង្ហោះសារផ្គើន Mbappe ក្រោយក្រុម Manchester City ត្រូវប្រកួតជាមួយ Paris Saint-Germain នៅវគ្គពាក់កណ្ដាលផ្ដាច់ព្រ័ត្រពាន Champions League ។
ប៉ុន្តែការពិតគឺសារនោះមិនបានបង្ហោះដោយ Phil Foden ផ្ទាល់នោះឡើយ គឺក្រុមហ៊ុន Ten Toes Media ដែល Foden បានជួលឲ្យគ្រប់គ្រងមើលការខុសត្រូវជំនួស ជាអ្នកបង្ហោះដោយឯកឯងហើយវាក៏ត្រូវបានលុបចោលរួចហើយដែរ។
យោងតាម Daily Mail បានឲ្យដឹងថា ពេលនេះ Foden មានការខឹងសម្បារនឹងក្រុមហ៊ុននេះជាខ្លាំងនិងបានផ្ដាច់កិច្ចសន្យាជួលភ្លាមៗក្រោយសារមួយនោះត្រូវបានបង្ហោះ។
ប៉ុន្តែ ក្រុមហ៊ុន Ten Toes Media បានបដិសេធថាការបង្ហោះទាំងអស់គឺត្រូវមានការព្រមព្រៀងពីសាមីខ្លួនជាមុនសិនដោយបានបង្ហោះសារបកស្រាយថា៖
ពួកយើងពិតជាសោកសៅណាស់ទៅលើស្ថានភាពមួយនេះ ។ ចាប់តាំងពីក្រុមហ៊ុនត្រូវបានបង្កើតឡើងមកគឺពួកយើងមានច្បាប់តម្រូវឲ្យគ្រប់ការបង្ហោះទាំងអស់ត្រូវមានការព្រមព្រៀងពីអ្នកតំណាងរបស់កីឡាករជាមុនសិនហើយពួកគេតែងតែអនុញ្ញាតឲ្យពួកយើងបង្ហោះសារទាំងឡាយ គឺដូចរយៈពេល៤ឆ្នាំមកនេះ។ Phil Foden គឺជាកីឡាករដ៏ពិសេសម្នាក់ ពួកយើងសូមឲ្យគេសំណាងល្អ។
Phil Foden បានជួលឲ្យក្រុមហ៊ុន Ten Toes Media នេះគ្រប់គ្រងលើគណនីបណ្ដាញសង្គម Instagram និង Twitter ដោយមានអ្នក Follow លើ Instagram ដល់ទៅ ១.៦លាននាក់ និង ៥សែននាក់លើ Twitter ហើយក្រុមហ៊ុនមួយនេះក៏ត្រូវកីឡាករជួរមុខជាច្រើនទៀតដូចជា Harry Kane, Andy Robertson, Trent Alexander-Arnold, Dominic Calvert-Lewin, Victor Lindelof, Vincius Junior និង Kasper Schmeichel សុទ្ធតែប្រើប្រាស់សេវាកម្មនេះទាំងអស់៕
ប្រភព៖ thesun
Bong I.T