អេស្ប៉ាញ៖ យោងតាមការរាយការណ៍ ក្លិបអធិរាជស Real Madrid បានបដិសេធមិនលក់ ខ្សែបម្រើ Martin Odegaard ទៅឲ្យក្លិបកាំភ្លើងធំ Arsenal នោះឡើយ ខណៈដែលកីឡាករ៣រូបផ្សេងទៀតដែលក្លិបប្តេជ្ញាថាមិនលក់ដាច់ខាតមាន ខ្សែប្រយុទ្ធ Rodrygo, Vinicius Junior និង Federico Valverde ផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្លិបកាំភ្លើងធំ Arsenal ដែលបានខ្ចីជើង Martin Odegaard មកពី Real Madrid បានព្យាយាមដាក់សំណើទិញផ្ដាច់យកកីឡាករសញ្ជាតិន័រវេសរូបនេះប៉ុន្តែភាគីរបស់លោកគ្រូបង្វឹក Zinedine Zidane បដិសេធដាច់អហង្ការព្រោះគិតថា Odegaard ជាកូនសោរសំខាន់សម្រាប់អនាគតរបស់ក្លិបបើទោះបីជាកន្លងមកខ្សែបម្រើរូបនេះត្រូវ Real Madrid ដាក់ឲ្យក្លិបផ្សេងខ្ចីជើងនៅតាមបណ្ដាក្លិបផ្សេងៗជារឿយៗក៏ដោយ។
Real Madrid ត្រូវបានគេរាយការណ៍ថាកំពុងព្យាយាមសម្លឹងរកមើលទីផ្សារសម្រាប់លក់កីឡាករក្នុងស្តុករបស់ខ្លួន ដើម្បីយកប្រាក់មកទិញខ្សែប្រយុទ្ធវ័យក្មេង Erling Haaland និង Kylian Mbappe ប៉ុន្តែយ៉ាងណាមិញក្លិបនឹងព្រមបើកផ្លូវឲ្យតែកីឡាករមួយចំនួនដូចជា Isco, Gareth Bale និង Marcelo ចាកចេញតែប៉ុណ្ណោះ។
ក្រៅពីនោះ Alvaro Odriozola,Mariano Diaz និងLuka Jovic ក៏អាចនឹងត្រូវក្លិបលក់ចេញឲ្យទៅក្លិបដទៃទៀតផងដែរ។
យ៉ាងណាមិញ កីឡាករឆ្នើមពីររូបទៀតដែលក្លិបមិនទាន់ច្បាស់ថាសម្រេចចិត្តច្បាស់លាស់គឺ ប្រធានក្រុម Sergio Ramos និង Lucas Vazquez ដែលទាំងពីរនាក់នេះមិនទាន់ព្រមព្រៀងបន្តកុងត្រាថ្មីនោះឡើយ។
ចំណែក អ្នកចាំទី Thibaut Courtois, Casemiro, Toni Kroos និង Karim Benzema ក៏ជាកីឡាករដែលក្លិបផ្សេងមិនអាចស្នើសុំទិញយកបានដែរ។
ប្រភព៖ dailymail