រន្ធត់ណាស់! ចោរប្លន់បានសម្រុកចូលផ្ទះរបស់ Smalling និងបង្ខំឲ្យគេធ្វើរឿងមួយនេះ

អ៊ីតាលី៖ អតីតខ្សែការពាររបស់ក្លិបបិសាចក្រហម Manchester United គឺ Chris Smalling និងក្រុមគ្រួសារបានជួបប្រទះនឹងហេតុការណ៍រន្ធត់មួយ នោះគឺចោរប្លន់ប្រដាប់ដោយកាំភ្លើងបានសម្រុកចូលផ្ទះរបស់ពួកគេ ដើម្បីគំរាមកំហែងទាមទារយកទ្រព្យសម្បត្តិ។

កំលុងពេលហេតុការណ៍មួយនោះកើតឡើង Smalling បានស្នាក់នៅក្នុងផ្ទះជាមួយភរិយានិងកូនប្រុសហើយសុខៗបុរសបីនាក់ដែលមានកាំភ្លើងមកជាមួយ បានលុកលុយផ្ទះរបស់គេដោយកាលណោះកីឡាករវ័យ៣១ឆ្នាំរូបនេះកំពុងដេកលក់។

Chris Smalling ត្រូវបង្ខំឲ្យបើកទ្វារទូដែកសុវត្ថិភាពរបស់គេហើយចោរនោះបានបញ្ជាឲ្យគេយកនាឡិកា ម៉ាក Rolex ព្រមទាំងគ្រឿងអលង្ការជាច្រើនទៀត នេះបើយោងតាមសារព័ត៌មាន Gazzetta Dello Sport ។

ភរិយារបស់គេគឺអ្នកនាង Sam ដែលមានអាយុ៣៥ឆ្នាំបានរាយការណ៍ហៅប៉ូលិសតាមទូរស័ព្ទនៅម៉ោងប្រាំព្រឹក បន្ទាប់ពីរឿងហេតុដ៏តក់ស្លុតនេះបានកើតឡើងខណៈដែលផ្ទះរបស់ពួកគេស្ថិតនៅម្ដុំ Appia Antica ឯទីក្រុងរ៉ូម ប្រទេសអ៊ីតាលី។

Chris Smalling និងភរិយាព្រមទាំងកូនប្រុសសុទ្ធតែកំពុងស្ថិតក្នុងស្ថានភាពតក់ស្លុត ប៉ុន្តែក្រុមអាជ្ញាធរប៉ូលិសនឹងចាប់ផ្ដើមបើកការស៉ើបអង្កេតពេញទំហឹង។

គួរបញ្ជាក់ផងដែរថា Smalling ផ្ទេរពី Manchester United មក Roma កាលពីឆ្នាំមុនបន្ទាប់ពីលេងខ្ចីជើងនៅទីនោះបានមួយរដូវកាល ដោយធ្លាប់បានលើកពាន Premier League ពីរដងជាមួយបិសាចក្រហមក្នុងរយៈពេល១០ឆ្នាំដែលស្នាក់នៅទឹកដី Old Trafford ហើយក្នុងឆ្នាំ២០១៧ គឺគេបានរៀបការជាមួយអ្នកនាង Sam ដោយបង្កើតបានកូនប្រុសឈ្មោះ Leno ៕

ប្រភព៖ thesun