Liverpool និង Dortmund ធ្លាក់ត្រឹមវគ្គ៨ក្រុមចុងក្រោយ ខណៈដែល Real Madrid និង Man City ឡើងទៅកាន់វគ្គពាក់កណ្តាលផ្តាច់ព្រ័ត្រ

បរទេស៖ ការប្រកួតបាល់ទាត់ជើងទី២នៃវគ្គ៨ក្រុមចុងក្រោយបានរកឃើញបួនក្រុមដែលត្រូវឡើងទៅកាន់វគ្គពាក់កណ្តាលផ្តាច់ព្រ័តនៃពានរង្វាន់ UEFA Champions League។

ការប្រកួតដ៏កក្រើកយប់មិញនេះគឺជាជំនួបរវាងក្រុម Liverpool ជាមួយ Real Madrid ខណៈមួយគូទៀតគឺរវាងក្រុម Dortmund ជាមួយក្រុម Manchester City ពោលគឺក្រុមម្ចាស់ផ្ទះទាំងពីរគឺសុទ្ធតែបញ្ចប់ទៅដោយលទ្ធផលមិនគាប់ប្រសើរដែលធ្វើឲ្យពួកគេធ្លាក់ត្រឹមវគ្គ៨ក្រុមចុងក្រោយ។

ក្នុងនោះផងដែរការប្រកួតនៅទឹកដីអង់គ្លេសរវាងក្រុមហង្សក្រហមLiverpool និង Real Madrid គឺពិតជាជំនួបដ៏តានតឹងខ្លាំង ខណៈដែលជើងទី១គឺក្រុមហង្សក្រហមLiverpool បានបរាជ័យនៅលើទឹកដីរបស់Real Madrid ដោយលទ្ធផល ៣ទល់នឹង១ ខណៈពេលនេះពួកគេត្រូវការគ្រាប់បាល់២គ្រាប់ជាចាំបាច់ដើម្បីមានឱកាសឡើងទៅវគ្គបន្ត ប៉ុន្តែការព្យាយាមរបស់ពួកគេបានត្រឹមតែបញ្ចប់ទៅដោយលទ្ធផលស្មើរគ្នា ០ទល់នឹង០ ដូចច្នះ Real Madrid គឺជាអ្នកឡើងទៅកាន់វគ្គបន្តដែលត្រូវជួបជាមួយក្រុមតោខៀវ Chelsea ។

ចំណែកឯការប្រកួតរវាងក្រុម Dortmund ជាមួយនឹង Manchester City ក៏ជាការប្រកួតមួយដ៏តានដឹងដោយក្រុម ម្ចាស់ផ្ទះ Dortmund ត្រូវការគ្រាប់បាល់ជាចាំបាច់ដើម្បីមានឱកាសឡើងទៅកាន់វគ្គបន្ត ប៉ុន្តែពួកគេបានខិតខំប្រឹងប្រែងហើយការតស៊ូរបស់ពួកគេគឺបានមួយគ្រាប់ទៅលើ Manchester City ក្នុងការនាំមុខជាបណ្តោះអាសន្នប៉ុន្តែអ្វីៗក៏អាចកើតឡើងបាននៅក្នុងវិស័យបាល់ទាត់ដោយក្រុម Manchester City បានដាក់សម្ពាធជាថ្មីទៅលើពួកគេហើយទទួលបានជ័យជម្នះ ២ទល់នឹង១ ដូចទៅនឹងលទ្ធផលកាលពីជើងទី១ សរុបមកManchester Cityនៅតែជាក្រុមដែលឡើងទៅកាន់វគ្គពាក់កណ្តាលផ្តាច់ព្រ័ត ព្រោះលទ្ធផលជារួមគឺ Manchester City បានឈ្នះទៅលើ Dortmund ដោយលទ្ធផល ៤ ទល់នឹង ២។គួរបញ្ជាក់ផងដែរថាក្រុមមេឃខៀវ Manchester City គឺត្រូវជួបក្រុមអ្នកមានបារាំង PSG នៅវគ្គពាក់កណ្តាលផ្តាច់ព្រ័ត្រ៕