Bayern ធ្លាក់ត្រឹមវគ្គ៨ក្រុមចុងក្រោយ ខណៈ PSG និង Chelsea ឡើងទៅកាន់វគ្គពាក់កណ្តាលផ្តាច់ព្រ័ត្រនៃពានរង្វាន់ UCL

បរទេស៖ ការប្រកួតបាល់ទាត់ជើងទី២នៃវគ្គ៨ក្រុមចុងក្រោយបានរកឃើញពីរក្រុមដែលត្រូវឡើងទៅកាន់វគ្គពាក់កណ្តាលផ្តាច់ព្រ័តនៃពានរង្វាន់ UEFA Champions League។

ការប្រកួតដ៏កក្រើកយប់មិញនេះគឺជាជំនួបរវាងក្រុម PSG ជាមួយ Bayern Muchen ខណៈមួយគូទៀតគឺរវាងក្រុម Chelsea ជាមួយក្រុម Porto ពោលគឺក្រុមម្ចាស់ផ្ទះទាំងពីរគឺសុទ្ធតែបញ្ចប់ទៅដោយបរាជ័យក្រោមថ្វីជើងរបស់ក្រុមភ្ញៀវ១ទល់នឹង០ដូចគ្នា ប៉ុន្តែសរុបគ្រាប់បាល់ទៅគឺក្រុមម្ចាស់ផ្ទះទាំងពីរជាអ្នកឡើងទៅកាន់វគ្គពាក់កណ្តាលផ្តាច់ព្រ័ត្រ។

ក្នុងនោះផងដែរការប្រកួតនៅទឹកដីបារាំងរវាង PSG និង Bayern Muchen គឺពិតជាជំនួបដ៏តានតឹងខ្លាំង ខណៈដែលជើងទី១គឺក្រុមយក្សអាល្លឺម៉ង់និងម្ចាស់ជើងឯករដូវកាលមុនបានបរាជ័យនៅលើទឹកដីខ្លួនឯងដោយលទ្ធផល ៣ទល់នឹង២ ខណៈពេលនេះពួកគេត្រូវការគ្រាប់បាល់ក្រៅដីជាចាំបាច់ដើម្បីមានឱកាសឡើងទៅវគ្គបន្ត ប៉ុន្តែការព្យាយាមរបស់ពួកគេបានត្រឹមតែមួយគ្រាប់ប៉ុណ្ណោះ ដោយសរុបលទ្ធផលទៅគឺ ៣ ទល់នឹង ៣ ប៉ុន្តែ PSG មានគ្រាប់ក្រៅដីរហូតទៅដល់៣គ្រាប់ ខណៈBayern Muchen មានតែមួយគ្រាប់ ជាលទ្ធផល PSG គឺជាអ្នកឡើងទៅកាន់វគ្គបន្តដែលត្រូវជួបជាមួយក្រុមManchester City ឬ Borussia Dortmund ។

ចំណែកឯការប្រកួតរវាងក្រុមតោខៀវ Chelsea ជាមួយនឹង Porto ក៏ជាការប្រកួតមួយដ៏តានដឹងដោយក្រុម Porto ត្រូវការគ្រាប់បាល់ក្រៅដីយ៉ាងតិច២គ្រាប់ជាចាំបាច់ដើម្បីមានឱកាសឡើងទៅកាន់វគ្គបន្ត ប៉ុន្តែពួកគេបានខិតខំប្រឹងប្រែងហើយការតស៊ូរបស់ពួកគេគឺបានទទួលជ័យជម្នះទៅលើក្រុម Chelsea ១ទល់នឹង០ ទោះជាយ៉ាងនេះក្តីក្រុម Chelsea នៅតែជាក្រុមដែលឡើងទៅកាន់វគ្គពាក់កណ្តាលផ្តាច់ព្រ័ត ព្រោះលទ្ធផលជារួមគឺ Chelsea បានឈ្នះទៅលើPorto ដោយលទ្ធផល ២ ទល់នឹង ១។គួរបញ្ជាក់ផងដែរថាក្រុមតោខៀវ Chelsea នឹងត្រូវជួបក្រុម Real Madrid ឬហង្សក្រហម Liverpool នៅវគ្គពាក់កណ្តាលផ្តាច់ព្រ័ត្រ៕