អង់គ្លេស៖ Gary Neville បានសារភាពថាពីដំបូងលោកធ្លាប់មានការបារម្ភខ្លះដែរ ដែល Manchester United បានចុះកុងត្រាយកខ្សែប្រយុទ្ធចាស់វស្សា Edinson Cavani ខណៈលោកភ័យខ្លាចចំពោះការមកដល់របស់ខ្សែប្រយុទ្ធសញ្ជាតិអ៊ុយរូហ្កាយរូបនេះ ថានឹងអាចខុសដូចកាលពេល Man UTD បានចុះកុងត្រាយក Radamel Falcao ឬក៏ Alexis Sanchez, ប៉ុន្តែពេលនេះហាក់ផ្ទុយស្រឡះពីអ្វីដែលអតីតវីរៈបុរសរូបនេះបានគិត មិនត្រឹមតែប៉ុណ្ណោះ លោកកំពុងតែជម្រុញឱ្យក្រុមបិសាចក្រហមបន្តកុងត្រាថ្មីសម្រាប់ Cavani បន្ថែមទៀត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ ចាប់តាំងពីការមកដល់របស់ Cavani អ្នកចាត់ការលោក Ole Gunnar Solskjaer ពិតជាមានការពេញចិត្តពេញថ្លើមចំពោះខ្សែប្រយុទ្ធដែលមានបទពិសោធន៍ជោគជាំរូបនេះជាខ្លាំង ទន្ទឹមនឹងនេះកំឡុងពេលដែល Man UTD បានចុះកុងត្រាយករូបគេមកកាន់ទឹកដី Old Trafford គឺមិនមានតម្លៃខ្លួននោះទេ។
យ៉ាងណាមិញ ដោយសារតែការបង្ហាញខ្លួនល្អបែបនេះ បានធ្វើឱ្យក្រុមបិសាចក្រហមកំពុងតែអន្ទះអន្ទែងចង់ឱ្យ Cavani បន្តកុងត្រាថ្មី ១ រដូវកាលបន្ថែមទៀត ក្នុងនោះដែរលោក Neville ជឿជាក់យ៉ាងច្បាស់ថា គាត់គឺមានតួនាទីសំខាន់ខ្លាំងណាស់ក្នុងការលេងនៅ Old Trafford ហើយវានឹងកាន់តែល្អប្រសើរប្រសិនបើគាត់ព្រមបន្តកុងត្រាថ្មីជាមួយក្លិប។
ថ្លែងប្រាប់គេហទំព័រ Sky Sports លោក Neville បានមានប្រសាសន៍យ៉ាងដូច្នេះថា៖
គាត់គឺជាគំរូដ៏អស្ចារ្យ។ ខ្ញុំធ្លាប់មានការព្រួយបារម្ភខ្លះដែរក្នុងការមកដល់ដំបូងរបស់គាត់, ព្រោះថាជាឧទាហរណ៍ស្រាប់ Falcao និង Alexis Sanchez ក្លិបបានខុសក្នុងការនាំយកពួកគេមកកាន់ Old Trafford។ ប៉ុន្តែនេះជារឿងខុសគ្នា។ គាត់ពិតជាអភិវឌ្ឍន៍ខ្លួនបានអស្ចារ្យមែនទែន ហើយគាត់ក៏បានចូលរួមចំណែកជួយ Man UTD ច្រើនណាស់ដែរ៕
ប្រភព៖ Goal
Bong I.T