អេស្ប៉ាញ៖ ក្លិបអ្នកមានបុណ្យ Barcelona ត្រូវបានគេរាយការណ៍ថាកំពុងប្រញាប់ប្រញាល់ចរចាបន្តកុងត្រាថ្មីជាមួយ ខ្សែបម្រើឆ្នើមវ័យក្មេង Pedri Gonzalez ព្រោះខ្លាចក្លិបហង្សក្រហម Liverpool ឆក់យកបាត់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សថ្មីៗនេះ មានប្រភពមួយបានបង្ហើបឲ្យដឹងថា ភាគីរបស់លោកគ្រូបង្វឹក Jurgen Klopp កំពុងសម្លឹងចង់បាន Pedri ដល់ថ្នាក់ឲ្យអ្នកតំណាងទាក់ទងទៅក្លិបថែមទៀតផង ខណៈដែលកីឡាករវ័យត្រឹមតែ១៨ឆ្នាំរូបនេះបានចូលលេងញឹកញាប់សឹងតែរាល់ការប្រកួតរបស់ Barcelona ក្រោមការដឹកនាំរបស់លោកគ្រូ Ronald Koeman គឺសរុប៤៣ប្រកួត និងបង្ហាញខ្លួនឲ្យជម្រើសជាតិអេស្ប៉ាញបាន៣ប្រកួត។
យោងតាមសារព័ត៌មាន The Mirror គឺ Barcelona នឹងចងជើង Pedri ឲ្យស្នាក់នៅ Camp Nou បន្តទៀតខណៈដែលកុងត្រារបស់គេនឹងផុតនៅរដូវក្ដៅឆ្នាំក្រោយនេះហើយ។ គេដឹងថាតម្លៃផ្ដាច់កុងត្រារបស់ Pedri ខ្ទង់ ៧០លានផោន(ស្មើនឹងប្រមាណ៩៥.៩លានដុល្លារ)។
Barcelona គ្រោងនឹងផ្ដល់កុងត្រាចំនួន៤ឆ្នាំទៀតដល់ Pedri Gonzalez ហើយនឹងបន្ថែមតម្លៃផ្ដាច់កុងត្រាឲ្យកើនដល់ទៅ ៣៥០លានផោន (ស្មើនឹងប្រមាណ៤៧៩.៧លានដុល្លារ) ឯណោះ៕
ប្រភព៖ dailymail