អេស្ប៉ាញ៖ កីឡាករ Frenkie de Jong ចេញមុខសារភាពថា ខ្លួនពិតជាសប្បាយចិត្តដែលគ្រូបង្វឹកដាក់ឱ្យរូបគេលេងតួនាទីជាខ្សែការពារ នៅពេលដែលតម្រូវការចាំបាច់របស់ក្រុម ប៉ុន្តែគាត់មិនដែលមើលឃើញខ្លួនឯងថាអាចនឹងលេងតួនាទីជាខ្សែការពារកណ្តាលក្រោមការដឹកនាំរបស់លោក Ronald Koeman បានទៀតទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
បុរសសញ្ជាតិហូល្លង់ កំពុងត្រូវបានក្លាយជាកម្លាំងចលករដ៏សំខាន់របស់ក្រុមអ្នកមានបុណ្យ FC Barcelona នៅក្នុងរដូវកាលនេះជាមួយនឹងសមត្ថភាពជាខ្សែបម្រើដ៏ប៉ិនប្រសព្វរបស់គាត់ ប៉ុន្តែថ្មីៗនេះលោក Koeman បានផ្តល់សេចក្តីទុកចិត្តឱ្យគេបន្ថែមទៀតក្នុងការជំនួសតំណែងមកលេងនៅក្នុងតំបន់ការពារកណ្តាល បន្ទាប់ពីខ្សែការពារមួយចំនួនត្រូវបានរងរបួស។
ជាការពិតណាស់ De Jong ត្រូវបានបំពេញតួនាទីនេះបានយ៉ាងល្អ រហូតដល់គេបានប្រៀបធៀបទម្រង់លេងរបស់គាត់ជាមួយនឹងលោក Koeman កាលពីអតីតកាលទៀតផង ប៉ុន្តែជារួមបុរសវ័យ ២៣ ឆ្នាំបានសារភាពចំៗថារូបគេមិនដែលពេញចិត្តនឹងលេងជាខ្សែការពារទេ ដោយគេចង់ទៅលេងតួនាទីជាខ្សែបម្រើវិញ។
ថ្លែងប្រាប់គេហទំព័រ Goal កីឡាករ De Jong បាននិយាយយ៉ាងដូច្នេះថា៖
ខ្ញុំមិនដែលមើលឃើញខ្លួនឯង ថាអាចលេងតួនាទីជាខ្សែការពារកណ្តាលសម្រាប់ពេលវេលាដែលនៅសេសសល់ក្នុងអាជីពរបស់ខ្ញុំបានទេ។ សម្រាប់ខ្ញុំបច្ចុប្បន្នគឺមិនអីទេ ប៉ុន្តែខ្ញុំពេញចិត្តនឹងលេងជាខ្សែបម្រើកណ្តាលដូចដើមវិញ។ ប៉ុន្តែប្រសិនបើក្រុមតម្រូវឱ្យខ្ញុំលេងតួនាទីផ្សេងទៀត ខ្ញុំមិនប្រកែកទេ ខ្ញុំនឹងធ្វើវា៕
ប្រភព៖ Goal
Bong I.T