មិន​ត​កុងត្រា​ឱ្យ​ ទើប​ចំឡែក​! Man City គ្រោង​បន្ត​កុងត្រា​ឱ្យ​កីឡាករ​ខ្លួន ២រូបបន្ថែមទៀត

Eurosport បានឱ្យដឹងថា បន្ទាប់ពីបានបន្តកុងត្រាជាមួយកីឡាករឆ្នើមរបស់ខ្លួន គឺកីឡាករ Kevin De Bruyne រហូត​ដល់ឆ្នាំ២០២៥ កាលពីពេលថ្មីៗនេះ ឥឡូវនេះ Manchester City គ្រោងនឹងបន្តកុងត្រាឱ្យកីឡាករ​សំខាន់​របស់ក្លឹប ២រូបបន្ថែមទៀត រួមមាន ខ្សែប្រយុទ្ធស្លាប Raheem Sterling និងខ្សែបម្រើប្រយុទ្ធ Phil Foden មុន​ពេល​រដូវ​កាលនេះបញ្ចប់។

Raheem Sterling វ័យ ២៦ឆ្នាំ បានចំណាយពេលជិត ៦រដូវកាលនៅទឹកដី Etihad ក្រោយចាកចេញពីក្លឹប Liverpool កាលឆ្នាំ២០១៥ ជាមួយតម្លៃខ្លួនប្រមាណ ៦៣.៧០លានអឺរ៉ូ និងបានបង្ហាញខ្លួនសរុបឱ្យក្លឹប Manchester​ City បានចំនួន ២៨២ប្រកួតក្នុងនោះរូបគេរកបាន ១១៣គ្រាប់ និងបញ្ជូនបាល់បាន ៨៦គ្រាប់​ផង​ដែរ​។

ចំណែកខ្សែបម្រើប្រយុទ្ធវ័យ ២០ឆ្នាំ កីឡាករ Phil Foden គឺជាធនធានយុវជនដែលបណ្តុះបណ្តាលដោយក្លឹប Machester City ផ្ទាល់ ដោយបានបង្ហាញខ្លួនក្នុងឈុតធំរបស់ក្លឹបដំបូងកាលពីដើមរដូវកាល ២០១៧-២០១៨ រហូតមកដល់បច្ចុប្បន្ន រូបគេបង្ហាញខ្លួនឱ្យក្លឹបសរុបបានចំនួន ១១៣ប្រកួត ទាត់បញ្ជូលទីបាន ២៧គ្រាប់ និងបញ្ជូន​បាល់បាន ២១គ្រាប់ផងដែរ ខណៈបច្ចុប្បន្ន រូបគេបានក្លាយជាកីឡាករសំខាន់ម្នាក់របស់លោក Pep Guardiola៕