កំហុសទី១៖ ចុចបិទម៉ោងរោទ៍ (snooze)
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការចុច snooze ម៉ោងរោទន៍ម្តងហើយម្តងទៀត មានតែធ្វើឲ្យពេលវេលាសម្រាករបស់អ្នកមានភាពមិនទៀងទាត់ និងធ្វើឲ្យពិបាកចូលគេង និងក្រោកនៅថ្ងៃបន្ទាប់។
កំហុសទី២៖ មើលទូរស័ព្ទភ្លាមក្រោយភ្ញាក់ពីគេង
ការមើលទូរស័ព្ទ ដូចជាឆែកអ៉ីម៉ែល ឬប្រព័ន្ធសង្គមភ្លាមៗបន្ទាប់ពីក្រោកពីគេងអាចប៉ះពាល់ដល់សតិអារម្មណ៍ ព្រមទាំងបង្កើននូវអារម្មណ៍ស្ត្រេស និងការព្រួយបារម្ភថែមទៀតផង។
កំហុសទី៣៖ ក្រោកពីគ្រែលឿនពេក
ការដែលផ្លាស់ប្តូរឥរិយាបថពីការគេងមកជាឈរភ្លាមៗ អាចជំរុញឲ្យសម្ពាធឈាមធ្លាក់ចុះ និងធ្វើឲ្យមានអាការៈធីងធោង ឬរហូតដល់សន្លប់ក៏មាន។ យកល្អគួរក្រោកឡើងអង្គុយ និងអាចពុតខ្លួនយឺតៗបន្តិចសិនមុននឹងក្រោកឈរ។
កំហុសទី៤៖ មិនលុបលាងមុខ និងដុសធ្មេញ
នៅអំឡុងពេលគេង អាចនឹងមានកោសិកាស្បែកដែលងាប់ ធូលី ឬកំទេចកំទីផ្សេងៗដែលមានលើពូក ឬខ្នើយតោងជាប់លើស្បែកដែលអាចបង្កជាផលប៉ះពាល់ដល់ស្បែក ប្រសិនមិនបានសម្អាត។ ដោយឡែកការរង់ចាំដុសសម្អាតធ្មេញនៅពេលទទួលទានអាហារហើយ អាចធ្វើឲ្យខូចខាតដល់ធ្មេញ ដូចនេះអ្នកគួរសម្អាតធ្មេញឲ្យរួចជាស្រេច ឬត្រូវរង់ចាំរហូតដល់យ៉ាងតិច 30នាទីក្រោយអាហារសឹមដុស។
កំហុសទី៥៖ ទទួលទានកាហ្វេព្រលឹមពេក
ការទទួលទានជាតិកាហ្វេអ៊ីននៅព្រឹកអំឡុងម៉ោង ៨ ដល់ ៩ព្រឹកអាចរារាំងដល់ដំណើរការប្រក្រតីនៃការផលិតអ័រម៉ូនស្ត្រេស cortisol ដែលមាននាទីក្នុងការជំរុញមេតាលីស គ្រប់គ្រងជាតិស្ករក្នុងឈាម និងជួយក្នុងការចងចាំផងដែរ។ ម្យ៉ាងទៀត ទម្លាប់ក្នុងការទទួលទានកាហ្វេដើម្បីជំរុញការផ្តោតអារម្មណ៍ និងផ្តល់ថាមពលភ្លាមៗ ធ្វើឲ្យរាងកាយពឹងផ្អែកលើជាតិកាហ្វេអ៊ីន ជាជាងដំណើរការប្រក្រតីរបស់រាងកាយ ដែលអាចតម្រូវឲ្យបង្កើនការទទួលទានកាន់តែច្រើនដើម្បីទទួលបានថាមពលដូចគ្នានៅពេលក្រោយផងដែរ។
យកល្អគួរទទួលទានកាហ្វេនៅអំឡុងម៉ោង ១០ព្រឹក និងពេលរសៀលអំឡុងម៉ោង ២ ទៅ ៥ ជំនួសវិញ។ ប្រសិនអ្នកមានទម្លាប់ទទួលទានកាហ្វេពេលព្រឹកព្រលឹម ក៏មិនគួរផ្អាកភ្លាមៗដែរ តែអាចកាត់បន្ថយបន្តិចម្តង និងជំនួសវិញនូវការទទួលទឹកក្តៅឧណ្ហៗជាមួយក្រូចឆ្មារ និងទឹកឃ្មុំដើម្បីផ្តល់នូវអារម្មណ៍ស្រស់ស្រាយ និងជំរុញមេតាបូលីសបានប្រសើរ។
កំហុសទី៦៖ រំលងអាហារពេលព្រឹក
អាហារពេលព្រឹកអាចនឹងជំរុញលទ្ធភាពក្នុងធ្វើមេតាបូលីសក្នុងរាងកាយដើម្បីផ្តល់ជាថាមពល សមត្ថភាពក្នុងការផ្តោតអារម្មណ៍ និងជួយការពារពីជំងឺជាច្រើនរួមមានជំងឺធាត់លើសទម្ងន់ និងជំងឺបេះដូងជាដើម។
កំហុសទី៧៖ ទទួលទានអាហារ ឬចំណីមានជាតិស្ករច្រើន
ជាតិស្ករក្នុងអាហារ ឬភេសជ្ជៈ នឹងត្រូវបានដុតរំលាយយ៉ាងរហ័ស និងផ្តល់ថាមពលភ្លាមៗរយៈពេលខ្លី រួចបន្សល់ឲ្យយើងនូវភាពអស់កម្លាំង ឃ្លាន និងមួម៉ៅទៅវិញ។ ជាការល្អ គួរជ្រើសរើសអាហារដែលសម្បូរប្រូតេអ៊ីន និងជាតិសរសៃវិញដែលវាអាចចំណាយពេលយូរជាងក្នុងការដុតរំលាយ និងធ្វើឲ្យយើងឆ្អែតបានយូរ ព្រមទាំងផ្តល់ថាមពេលប្រកបដោយតុល្យភាព៕