ទីបំផុត! ក្រុមជម្រើសជាតិអេត្យូពីបានត្រឡប់ទៅកាន់ការប្រកួតបាល់ទាត់ទ្វីបអាហ្វ្រិកម្ដងទៀត បន្ទាប់ពីអវត្តមាន ៨ ឆ្នាំ

អេត្យូពី៖ ក្រុមជម្រើសជាតិអេត្យូពីនឹងវិលត្រឡប់ទៅកាន់ការប្រកួតបាល់ទាត់ទ្វីបអាហ្វ្រិក (AFCON) វិញបន្ទាប់ពីអវត្តមានរយៈពេល ៨ ឆ្នាំ បើទោះបីជាបានចាញ់ការប្រកួតចុងក្រោយរបស់ខ្លួនជាមួយក្រុមជម្រើសជាតិកូដឌីវ័រកាលពីថ្ងៃអង្គារក៏ដោយ។ ក្រុមជម្រើសជាំតិអេត្យូពីបានចាញ់ការប្រកួតចុងក្រោយក្នុងលទ្ធផល ៣-១ ក្រោមស្នាដៃក្រុមកូឌឌីវ័រ។

ក្រុមអេត្យូពីបានឆ្លងកាត់ផុតវគ្គជម្រុះ បន្ទាប់ពីក្រុមម៉ាដាហ្គាស្កាទទួលបានលទ្ធផលស្មើដោយគ្មានគ្រាប់បាល់ជាមួយនឹងក្រុមនីហ្សេរីយ៉ានៅក្នុងការប្រកួតផ្សេងទៀតក្នុងពូល ដែលមានន័យថាក្រុមកីឡាបាល់ទាត់របស់ប្រទេសអាហ្រ្វិកខាងកើតមួយនេះបានបញ្ចប់ក្នុងចំណាត់ថ្នាក់លេខ ២ ក្នុងពូលនិងទទួលបានកៅអីមួយទៅព្រឹត្តិការណ៍ AFCON លើកទី ៣៣ ។

ចំណែកក្រុមកូដឌីវ័រឈរនៅលើកំពូលតារាងដោយមានក្រុមម៉ាដាហ្គាស្ការ និងនីហ្សេរីយ៉ាបានបញ្ចប់ក្នុងចំណាត់ថ្នាក់ទី ៣ និងទី ៤ ដែលក្រុមទាំងពីរត្រូវខកខានមិនបានចូលរួមក្នុងព្រឹត្តិការណ៍ AFCON លើកទី ៣៣ នោះទេ។

ខណៈដែលក្រុមប្រទេសកាមេរូននឹងធ្វើជាម្ចាស់ផ្ទះនៃព្រឹត្តិការណ៍ AFCON លើកទី ៣៣ ដែលនឹងត្រូវធ្វើឡើងនៅខែមករាឆ្នាំ ២០២២។ ហើយប្រទេសអាល់ហ្សេរីគឺជាក្រុមការពារតំណែងជើងឯក។

ការចូលរួមរបស់ប្រទេសអេត្យូពីនៅក្នុងការប្រកួតបាល់ទាត់ទ្វីបអាហ្វ្រិកបន្ទាប់ពីអវត្តមានអស់រយៈពេល ៨ ឆ្នាំត្រូវបានស្វាគមន៍យ៉ាងកក់ក្តៅនៅក្នុងរដ្ឋធានីអាឌីសអាបាបារបស់ប្រទេសអាហ្វ្រិកខាងកើតជាមួយប្រជាជនដែលគោរពទង់ជាតិនៅលើរថយន្តនិងគ្រវីទង់ពណ៌លឿងលាយក្រហមនិងបៃតងរបស់ប្រទេសផងដែរ។

គួរឱ្យដឹងដែរថា ក្រុមបាល់ទាត់ជម្រើសជាតិអាហ្រ្វិកសរុបចំនួន ២៤ ក្រុមដែលត្រូវបានចែកចេញជា ៦ ពូល និងមានចំនួន ៤ ក្រុមក្នុងមួយពូលនោះត្រូវបានគេរំពឹងថានឹងចូលរួមប្រកួតក្នុងព្រឹត្តិការណ៍ AFCON លើកទី ៣៣ ដែលជាការប្រកួតបាល់ទាត់ដ៏ល្បីល្បាញបំផុតរបស់ទ្វីបអាហ្វ្រិក៕

ប្រភព៖ Xinhua News