អាមេរិក៖ ក្រោយកូរ៉េខាងជើងសាកល្បងមីស៊ីលរួច កាលពីថ្ងៃអង្គារកន្លងទៅនេះ ក្រុមប្រឹក្សាសន្តិសុខអង្គការសហប្រជាជាតិ (UNSC) ក៏បានបើកកិច្ចប្រជុំមួយដើម្បីពិភាក្សា។ បើទោះបីសហរដ្ឋអាមេរិកនិយាយថា ស្ថាប័នពិភពលោកមួយនេះកំពុងពិចារណាលើវិធានការថ្មីក៏ដោយ ក៏ UNSC មិនបានចាត់វិធានការភ្លាមៗដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
បន្ទាប់ពីកិច្ចប្រជុំបិទទ្វាររយៈពេលកន្លះម៉ោងមក គេមិនឃើញមានសេចក្តីថ្លែងការណ៍ណាមួយចេញពីក្រុមប្រឹក្សាសន្តិសុខ ឬពីបណ្តាប្រទេសអឺរ៉ុបនោះឡើយ ដែលផ្ទុយស្រឡះពីមួយឆ្នាំមុន ប្រទេសអឺរ៉ុបចំនួន៥បានថ្កោលទោសការសាកល្បងមីស៊ីលរបស់កូរ៉េខាងជើងថា ជា “ការបង្កហេតុ”។
ស្របជាមួយគ្នានេះ កូរ៉េខាងជើងក៏បានប្រកាសថ្កោលទោសកិច្ចប្រជុំខាងលើនេះ ដែលត្រូវបានកោះហៅដោយអង់គ្លេស អេស្តូនី បារាំង អៀរឡង់ និងន័រវែស ។ បើតាមអ្នកការទូតម្នាក់ កិច្ចប្រជុំកាលពីថ្ងៃអង្គារកន្លងទៅនោះ សមាជិកភាគច្រើនមានការព្រួយបារម្ភ និងអំពាវនាវជាថ្មីឱ្យមានការរំសាយអាវុធនុយក្លេអ៊ែរ បើទោះបីជាគ្មានសេចក្តីថ្លែងការណ៍ណាមួយត្រូវបានគ្រោងទុកក៏ដោយ៕
Bong I.T