ជុំគ្នាផឹក មិនខ្វល់រឿងកូវីដ សមត្ថកិច្ចប៉ុស្តិ៍នគរបាលរដ្ឋបាលអូឡាំពិក ចុះអប់រំទាំងយប់

រាជធានីភ្នំពេញ៖ នៅយប់ថ្ងៃទី២៨ ខែមីនា ឆ្នាំ២០២១ ដោយអនុវត្តតាមការណែនាំរបស់លោកវរសេនីយ៍ឯក សុឹម ពិសិដ្ឋ អធិការនគរបាលខណ្ឌបឹងកេងកង សមត្ថកិច្ចប៉ុស្តិ៍នគរបាលរដ្ឋបាលអូឡាំពិក បានចុះល្បាត តាមគោលដៅនានាក្នុងមូលដ្ឋាន ដោយបានធ្វេីការណែនាំអប់រំ និងបញ្ឈប់សកម្មភាពជួបជុំផឹកស៊ីឡូឡា ដែលប្រាសចាកពីវិធានការណែនាំរបស់ក្រសួងសុខាភិបាល  នេះបើយោងតាមការបញ្ជាក់ឱ្យដឹងនៅលើផេកហ្វេសប៊ុកផ្លូវការរបស់ ស្នងនគរបាលរាជធានីភ្នំពេញ។ 

ក្នុងនោះដែរ ស្នងនគរបាលរាជធានីភ្នំពេញ ក៏បានសូមអំពាវអំនាវឱ្យប្រជាពលរដ្ឋទាំងអស់មេត្តាគួរគិតព្រួយបារម្ភពីការឆ្លងរីករាលដាលនៃជំងឺកូវីដ១៩ ដែលកំពុងតែរាលដាលកាន់តែខ្លាំងឡើងនៅប្រទេសកម្ពុជា ប៉ុន្តែនៅតែមានមនុស្សមួយចំនួនតូច នៅតែខ្វះការយល់ដឹងពិចារណា ដោយបានបន្តជួបជុំផឹកស៊ីដោយការរអែងចិត្តអ្នកដទៃ និង ភ័យខ្លាចទាល់តែសោះ៕