អស្ចារ្យណាស់! Mbappe ធ្វើបានកំណត់ត្រាពិសេសមួយ ក្រោយរកបាន២គ្រាប់ ក្នុងជំនួបជួយ PSG ឈ្នះ Lyon ៤-២ (មានវីដេអូ)

បារាំង៖ កីឡាករ Kylian Mbappe បានបង្ហាញទម្រង់យ៉ាងលេចធ្លោ ក្នុងជំនួបជួយក្រុម​ Paris Saint-Germain យកឈ្នះ ក្រុមម្ចាស់ផ្ទះ Lyon ៤-២ កាលពីរាត្រីថ្ងៃអាទិត្យ ទី២១ ខែមីនា កន្លងទៅនេះ ដោយរូបគេរកបាន២គ្រាប់ម្នាក់ឯង។

ការខិតខំប្រឹងប្រែងរបស់ខ្សែប្រយុទ្ធវ័យ២២ឆ្នាំ រូបនេះ បានធ្វើឲ្យរូបគេ ទទួលបានកំណត់ត្រាពិសេសមួយ ដោយក្លាយជាកីឡាករវ័យក្មេងបង្អស់ ដែលរកបាន១០០គ្រាប់ នៅក្របខណ្ឌ Ligue 1 ។

សម្រាប់ការប្រកួត កាលពីយប់មិញ Mbappe ជាអ្នកស៊ុតបើកឆាក មុនពេលខ្សែបម្រើ Danilo Pereira ស៊ុតចូលនៅនាទីទី៣២ និង Angel Dimaria ទាត់ហ្វ្រីឃីគចូលនៅដើមតង់ទី២។

ក្រោយមក Mbappe ក៏រកគ្រាបប់បានសាជាថ្មីម្ដងទៀត មុនក្រុម Lyon តដៃបាន២គ្រាប់វិញ តាមរយៈខ្សែប្រយុទ្ធ Islam Slimani និង ខ្សែកាពារ Maxwel Cornet។

គួរបញ្ជាក់ដែរថា តាមរយៈលទ្ធផលនេះ បានជួយ​ PSG រក្សាតំណែងកំពូលតារាង នៅក្របខណ្ឌ Ligue 1 សប្ដាហ៍ទី៣០ ដោយមាន៦៣ពិន្ទុ ស្មើគ្នាជាមួយក្រុមលេខ២ Lille និង ដាច់៣ពិន្ទុពីក្រុមលេខ៣ Lyon ៕

បើចង់ឃើញការស៊ុតបញ្ចូលទីជក់ចិត្តយ៉ាងណានោះ សូមទស្សនាវីដេអូខាងក្រោម៖