មិនធម្មតា! ក្មេងប្រុសអាយុ ៨ឆ្នាំ បំបែកកំណត់ត្រា​បង្វិលគូប ៣ ក្នុងពេលតែមួយ បានលឿនបំផុត

ឥណ្ឌា៖ តាមការចុះផ្សាយរបស់សារព័ត៌មាន UPI បានឱ្យដឹងថា ក្មេងប្រុសអាយុ ៨ឆ្នាំម្នាក់ បានបំបែកកំណត់ត្រាពិភពលោក ដោយប្រើប្រាស់ ដៃ និងជើងរបស់គេ បង្វិលគូប ៣ផ្សេងគ្នាក្នុងពេលតែមួយ បានលឿនបំផុត។

ក្មេងប្រុសម្នាក់នេះមានឈ្មោះថា Atharva R Bhat មកពីទីក្រុង Bangalore ប្រទេសឥណ្ឌា ជាជើង​​ឯកបង្វិលគូសបានលឿនបំផុត ក្នុងរយៈពេល ១នាទី ២៩.៩៧វិនាទី ដោយលឿនជាងកំណត់ត្រាចាស់ ៦វិនាទី។

យ៉ាងណាមិញ Bhat បានគូសបញ្ជាក់ថា រូបគេសម្រេចចិត្តចូល ការប្រកួតបំបែកកំណត់ត្រាពិភពលោកនេះ គឺបន្ទាប់ពីព្រឹត្តិការណ៍សមាគមគូបពិភពលោកប្រកាសដកការបង្វិលគូប ដោយប្រើជើងចេញ ជាហេតុធ្វើឱ្យរូបគេមិនសប្បាយយ៉ាងខ្លាំង។ ទន្ទឹមនឹងនោះ Bhat បានបន្ថែមថា នាឱកាសក្រោយៗទៀត រូបគេសង្ឃឹមថានឹងបំបែកកំណត់ត្រារបស់ខ្លួន ដោយបញ្ចប់ក្នុងរយៈពេលក្រោម ១នាទីប៉ុណ្ណោះ៕