អង់គ្លេស៖ លោកគ្រូបង្វឹក Jurgen Klopp របស់ក្លិបហង្សក្រហម Liverpool បានបង្ហើបថា ខ្សែប្រយុទ្ធ Robert Lewandowski នៃក្លិប Bayern Munich គឺជាកីឡាករដែលល្អបំផុតនិងពិសេសបំផុតតាមដែលលោកគ្រូធ្លាប់បង្វឹក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Lewandowski ធ្លាប់លេងឲ្យក្លិប Borussia Dortmund ដោយកាលឆ្នាំ២០១០ លោកគ្រូ Klopp ក៏ស្នាក់នៅទីនោះក្នុងនាមជាគ្រូបង្វឹកផងដែរទើបសម្ពន្ធភាពអតីតគ្រូ-សិស្ស មួយនេះពិតជាពិសេសព្រោះកាលពីពេលថ្មីៗទៅនេះ Lewandowski ធ្លាប់បង្ហើបថាគេបានភ្នាល់គ្នាជាមួយ Klopp ទៀតផង។
លោកគ្រូបង្វឹកសញ្ជាតិអាល្លឺម៉ង់រូបនេះធ្លាប់ដឹកនាំឲ្យ Dortmund ឈ្នះពាន Bundesliga ខណៈដែលនៅ Liverpool លោកគ្រូក៏បានដឹកនាំឲ្យក្រុមឈ្នះពាន Premier League,Champions League ផងដែរប៉ុន្តែក្នុងអាជីពជាគ្រូបង្វឹកកន្លងមក លោកគ្រូគិតថាគ្មានកីឡាករណាពិសេសដូច Robert Lewandowski នោះឡើយ។
លោកគ្រូបានថ្លែងប្រាប់សារព័ត៌មាន Bild ថា៖
Robert Lewandowski គឺជាកីឡាករដែលល្អបំផុតតាមដែលខ្ញុំធ្លាប់បង្វឹកមក វាមិនយុត្តិធម៌បើខ្ញុំបង្ហើបឈ្មោះអ្នកផ្សេងក្រៅពី Lewy ។ គេពិតជាពិសេសណាស់ គេខិតខំប្រឹងប្រែងកសាងខ្លួនក្លាយជាកីឡាករមួយរូបដូចសព្វថ្ងៃ គេពិតជាពិសេសជាងអ្នកដទៃ។ Lewy បានរៀនសូត្រគ្រប់ដំណាក់កាលដើម្បីក្លាយជាកីឡាករដែលរកគ្រាប់បាល់បានញឹកញាប់ដូចម៉ាស៊ីន។ គេវិភាគពីការប្រកួតបានល្អនិងដឹងថាគេត្រូវធ្វើយ៉ាងម៉េច រត់ទៅខាងណា គេដូចមិនមែនមនុស្សទេ គេជាម៉ាស៊ីន។
គួរបញ្ជាក់ផងដែរថាកាល លោកគ្រូ Klopp ជួប Lewandowski ដំបូងគឺគេមានអាយុត្រឹមតែ២១ឆ្នាំប៉ុណ្ណោះដោយចំណាយពេល៤រដូវកាលជាមួយគ្នា ស្របពេល Borussia Dortmund លើកពាន Bundesliga និង DFB-Pokal កាលរដូវកាល ២០១១-២០១២ ហើយក៏ធ្លាប់បានឡើងមកកាន់វគ្គផ្ដាច់ព្រ័ត្រពាន Champions League នៅរដូវកាលបន្ទាប់ប៉ុន្តែត្រូវចាញ់ក្រោមថ្វីជើងក្លិប Bayern Munich ផងដែរ៕
ប្រភព៖ goal
Bong I.T