ឃាត់លែងបានហើយ! កីឡាករ Man UTD ម្នាក់នេះរំអុក ចាកចេញពីក្លិបដោយគ្រោងនឹងទៅនិយាយជាមួយលោក Woodward ផ្ទាល់

អង់គ្លេស៖ យោងតាមសេចក្ដីរាយការណ៍ ខ្សែបម្រើ Donny Van De Beek នឹងចាកចេញពីក្លិបបិសាចក្រហម Manchester United បន្ទាប់ពីចំណាយពេលស្នាក់នៅទឹកដី Old Trafford បានតែ១រដូវកាលដោយសារតែគេសឹងតែមិនមាននាទីចូលលេងតាំងពីផ្ទេរពីក្លិប AFC Ajax ក្នុងតម្លៃខ្លួន៤០លានផោន (ឬស្មើនឹងប្រមាណ៥៥.៥លានដុល្លារ)។

កាលពីរដូវក្ដៅមុន De Beek ចាត់ទុកថាជាកីឡាករដែល Manchester United ចុះទុនបោះប្រាក់ច្រើនសន្ធឹកសន្ធាប់ដើម្បីទិញយកគេ ប៉ុន្តែជាក់ស្ដែងពេលមកលេងនៅទីនេះ កីឡាករសញ្ជាតិហូឡង់រូបនេះបែរជាអង្គុយតែកៅអីបម្រុងជាងរត់លើវាលស្មៅ។

សារព័ត៌មាន Daily Star បានបង្ហើបថា Donny van de beek មិនអាចប្រឈមនឹងស្ថានការណ៍បែបនេះបានទេហើយគេភ័យព្រួយណាស់ព្រោះចង់មាននាទីចូលលេងច្រើនដើម្បីជាប់ជម្រើសចូលលេងឲ្យក្រុមជម្រើសជាតិហូឡង់ក្នុងព្រឹត្តិការណ៍ Euro ខាងមុខដោយគ្រោងនឹងទៅពិភាក្សាជាមួយ CEO របស់ក្លិបបិសាចក្រហមគឺលោក Ed Woodward ទាក់ទងនឹងការចាកចេញរបស់គេនេះផងដែរ។

នៅរដូវកាលនេះ Van De Beek ជាប់ជម្រើស១១នាក់ដំបូងបានតែ១១ប្រកួតគត់ក្នុងការបង្ហាញខ្លួនសរុប១៥ប្រកួតរបស់គេ ខណៈដែលខ្សែបម្រើនៅ Man UTD មានគរជើងគ្នាប៉ុន្តែលោកគ្រូបង្វឹក Ole Gunnar Solskjaer ហាក់បីដូចជាពេញចិត្ត ខ្សែបម្រើ Scott McTominay, Nemanja Matic, Paul Pogba ,Fred និង Bruno Fernandes ជាង De Beek ទើបវាពិបាកក្នុងការដណ្ដើមតំណែងនេះ។

គួរបញ្ជាក់ផងដែរថា ខណៈនេះ កីឡាករវ័យ១៥ឆ្នាំរូបនេះគ្មានឈ្មោះក្នុងបញ្ជីកីឡាករដែលត្រូវចូលប្រកួតនោះឡើយដោយសារតែគេរងរបួសត្រង់សាច់ដុំកាលពីចុងខែកុម្ភៈកន្លងមកប៉ុន្តែក្នុងការប្រកួតទល់នឹង AC Milan ជើងទី២នេះ គេអាចនឹងមានឈ្មោះធ្វើដំណើរទៅទឹកដីអ៊ីតាលីដែរ។

កន្លងមក Van De Beek ធ្លាប់បង្ហាញទឹកមុខតក់ស្លុតនិងក្រៀមក្រំពេលលោកគ្រូបង្វឹក Ole Gunnar Solskjaer ប្ដូរគេចេញកាលប្រកួតទល់នឹង West Ham នៅនាទីទី៧៣ ធ្វើឲ្យមានការសង្ស័យថា De Beek ពិតជាមិនចង់ស្នាក់នៅទីនេះបន្តទេ៕

ប្រភព៖ dailymail