អង់គ្លេស៖ យោងតាមប្រភពព័ត៌មាន DailyMail បានឱ្យដឹងថា លោកតាចំណាស់ម្នាក់ បានប្រើប្រាស់ឈើគូស ក្នុងការបង្កើតជាសំណង់អច្ឆរិយល្បីៗនៅទូទាំងពិភពលោក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកតា Derrick អាយុ ៨៧ឆ្នាំមកពីទីក្រុង Sheffield ប្រទេសអង់គ្លេស បានចំណាយពេលអស់រាប់ម៉ោងក្នុងផ្ទះបាយតូចរបស់គាត់ ដើម្បីសាងសង់សំណង់អច្ឆរិយល្បីៗទាំងនេះឡើងវិញ ហើយស្នាដៃ ដែលគាត់បានសាងសង់រួច ក្នុងនោះរួមមាន ទូក Mississippi វិហារ Notre Dame រូបចម្លាក់នៃសេរីភាព សេតវិមាន និងប៉ម Tower Bridge ។
លោកតា បានបញ្ជាក់ប្រាប់ថា ជាធម្មតា គឺគាត់ចំណាយពេល ២ម៉ោងក្នុង ១ថ្ងៃ ដោយប្រើកាវបិទផ្គុំឈើនីមួយៗចូលគ្នា ដូចនេះហើយ ដោយសារសំណង់ខ្លះមានសភាពគ្រោងឆ្អឹងធំ ទើបសំណង់អច្ឆរិយមួយចំនួនត្រូវប្រើពេលជិត ១ឆ្នាំឯណោះ ដើម្បីសម្រេចវាបាន។ ទន្ទឹមនឹងនោះ លោកតាបានបង្ហើបប្រាប់ថា គន្លឹះសំខាន់ក្នុងការសាងសង់សំណង់អច្ឆរិយទាំងនេះឡើងវិញ គឺត្រូវការភាពអំណត់អត់ធ្មត់ខ្ពស់ ព្រោះសំណង់នីមួយៗ ត្រូវការស៊ីពេលវេលាច្រើនណាស់។
គួរជម្រាបដែរថា លោកតាបានចាប់ផ្ដើមចូលចិត្ដកិច្ចការទាំងនេះ ចាប់តាំងពីកូនស្រីរបស់គាត់ជូនអំណោយបែបសំណង់ផ្គុំ នៅថ្ងៃបុណ្យខួបរបស់គាត់មក ហើយវាក៏ក្លាយជាទម្លាប់របស់គាត់មកដល់សព្វថ្ងៃតែម្ដង៕