កម្រណាស់! ផូស៊ីលដាយណូស័រអង្គុយនៅលើស៊ុតរបស់វាទាំងមូល ត្រូវបានគេរកឃើញ

បរទេស៖ ក្រុមអ្នកវិទ្យាសាស្ត្រអន្តរជាតិ បានប្រកាសពីការរកឃើញសំបុកផូស៊ីលដ៏អស្ចារ្យនៅក្នុងប្រទេសចិន ដោយយ៉ាងហោចណាស់មានដាយណូស័រចំនួន8 តាំងពី70លានឆ្នាំមុន។ 

ផូស៊ីលស៊ុតបុរាណនេះជាស៊ុតរបស់ដាយណូស័រ oviraptor ដែលមានទំហំមធ្យម។ គ្រោងឆ្អឹងរបស់ ដាយណូស័រ oviraptor នេះគឺបានក្រាបលើពងរបស់វាជាងពីរឡូរឯណោះ ហើយយ៉ាងហោចណាស់7ពងក្នុងនោះ ស្ថិតក្នុងសភាពរៀបនឹងញាស់ទៅហើយ និងមានផ្ទុកអំប្រ៊ីយ៉ុងនៅខាងក្នុងទៀតផង។

ការរកឃើញនេះគឺមិនធ្លាប់មានពីមុនមក ហើយផ្តល់នូវភស្តុតាងដំបូងបង្អស់ដែលបញ្ជាក់ថា ដាយណូស័រជាសត្វដែលក្រាបពងរបស់ពួកវាក្នុងរយៈពេលយូរ។  

អ្នកវិទ្យាសាស្ត្របាននិយាយថា វាជាផូស៊ីលដ៏កម្របំផុតក្នុងចំណោមផូស៊ីលកម្រៗដទៃទៀត ទោះបីកាលពីមុនគេធ្លាប់រកឃើញផូស៊ីលក្រាបពងដូច្នេះដែរ ប៉ុន្តែមិនមានអំប្រ៊ឺយ៉ុងនៅក្នុងពងទាំងនោះ ដូចការរកឃើញលើកនេះទេ។

យ៉ាងហោចណាស់ពងចំនួនប្រាំពីរមានអំប្រ៊ីយ៉ុងនៅក្នុងនោះ រួមទាំងជាលិកាឆ្អឹងដែលរៀបនឹងក្លាយជាឆ្អឹង (ossified bones) ផងដែរ។

ពងមួយក្នុងចំណោមពងទាំងអស់ មានគ្រោងឆ្អឹងពេញលេញដោយមានទាំងឆ្អឹងខ្នង ឆ្អឹងជំនី ឆ្អឹងដើមដៃ និងឆ្អឹងជើង ដែលដេកក្នុងស៊ុតនោះ។

ព័ត៌មានដែលគេរកបានមិនមានត្រឹមតែអំពីការបន្តពូជរបស់វាប៉ុណ្ណឹងនោះទេ ផូស៊ីលដ៏កម្រនេះក៏បានផ្តល់ឱ្យអ្នកស្រាវជ្រាវដឹងពីរបបអាហាររបស់ដាយណូស័រ oviraptor ផងដែរ។ ជាលើកដំបូង អ្នកវិទ្យាសាស្ត្របានរកឃើញដុំថ្មតូចៗនៅក្នុងក្រពះរបស់ដាយណូស័រប្រភេទនេះ ដែលប្រហែលជាត្រូវបានលេបដើម្បីជួយដល់ការរំលាយអាហាររបស់វា។

ការស្រាវជ្រាវនេះត្រូវបានចេញផ្សាយនៅក្នុងព្រឹត្តិប័ត្រវិទ្យាសាស្ត្រ Science Bulletin៕