អង់គ្លេស៖ យោងតាមប្រភពសារព័ត៌មានរបស់ BBC បានឱ្យដឹងថា បុរសម្នាក់ ដែលជិះឧទ្ធម្ភាគចក្រមួយគ្រឿង ដើម្បីទៅទិញនំសាន់វិច ក្នុងចម្ងាយទៅវិញទៅមកសរុបជាង ១២៨គីឡូម៉ែត្រ ឥឡូវនេះអាចនឹងប្រឈមការផាកពិន័យ បន្ទាប់ពីរំលោភនឹងវិធានការកូវីដ-១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងវីដេអូ ដែលថតដោយម្ចាស់ហាងលក់នំ បានបង្ហាញឱ្យឃើញ ឧទ្ធម្ភាគចក្រមួយគ្រឿង ត្រូវគេដឹងថាបានហោះហើរចេញពីទីក្រុង Salford ហើយធ្វើការចុះចតនៅមុខហាងលក់នំមួយកន្លែង ក្នុងសង្កាត់ Ribble Valley ជិតទីក្រុង Preston ប្រទេសអង់គ្លេស។ វីដេអូដដែលនោះ ក៏បានបង្ហាញ បុគ្គលិកហាងនំម្នាក់ ដៃកាន់ថង់នំ ដើរសំដៅទៅរកអ្នកបើកឧទ្ធម្ភាគចក្រ ដែលកំពុងចតផងដែរ។
យ៉ាងណាមិញ បន្ទាប់ពីវីដេអូត្រូវបានគេបង្ហោះទៅលើបណ្ដាញសង្គម ក៏មានអ្នកប្រើប្រាស់បណ្ដាញសង្គមជាច្រើននាក់ សម្ដែងការមិនពេញចិត្តយ៉ាងខ្លាំងចំពោះទង្វើបែបនេះ ខណៈពេលប្រទេសកំពុងដាក់ចេញវិធានការរឹតបន្ដឹងការធ្វើដំណើរ។ ទន្ទឹមនឹងនោះ លោក Simon Hore អ្នកតំណាងឱ្យសង្កាត់ Ribble Valley ក៏បានមានប្រសាសន៍ដូចនេះដែរថា សកម្មភាពខាងលើ គឺពិតជាបានរំលោភបំពាននឹងការរឹតបន្តឹងការធ្វើដំណើរ ក្នុងអំឡុងពេលមានវីរុសកូវីដ-១៩ពិតមែន ហើយបច្ចុប្បន្ននេះ ប៉ូលិសក្នុងតំបន់ក៏កំពុងធ្វើការស៊ើបអង្កេតទៅលើករណីនេះផងដែរ៕