រុស្ស៊ី៖ អ្នកប្រដាល់សញ្ជាតិរុស្ស៊ីនៅសង្វៀន UFC ដ៏ល្បីល្បាញគឺ Khabib Nurmagomedov បានឆ្លើយនឹងសំណួរដែលអ្នកគាំទ្របាល់ទាត់លើពិភពលោកពេញនិយមសួរ ថាតើរវាង ខ្សែប្រយុទ្ធ Cristiano Ronaldo និង Lionel Messi តើគេគិតថាម្នាក់ណាល្អជាង?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ថ្វីត្បិត Khabib ជាអ្នកប្រដាល់មែនតែគេក៏ជាអ្នកស្នេហាវិស័យកីឡាបាល់ទាត់ណាស់ដែរ ដោយថ្មីៗមកនេះគេបានបង្ហោះរូបភាពខ្លួនឯងចូលលេងបាល់ ម្យ៉ាងទៀតកាលជំនួបរវាង Barcelona និង Paris Saint-Germain នៅក្របខណ្ឌ Champions League វគ្គ១៦ក្រុមជើងទី១ដែលធ្វើឡើងនៅកីឡដ្ឋាន Camp Nou ក៏ Khabib បានទៅចូលរួមទស្សនាដោយផ្ទាល់ផងដែរ។
យ៉ាងណាមិញ Khabib បានបង្ហើបថាគេជាអ្នកគាំទ្ររបស់ក្លិបអធិរាជស Real Madrid ហើយប្រាកដណាស់ថាគេគិតថាខ្សែប្រយុទ្ធ Cristiano Ronaldo ជាកីឡាករល្អជាង Lionel Messi ។
Khabib Nurmagomedov បានថ្លែងក្នុងកិច្ចសម្ភាសន៍ជាមួយតារា Youtube ជនជាតិរុស្ស៊ីឈ្មោះ Krasava ថា៖
ទាក់ទងនឹងរឿងនេះ ខ្ញុំនឹងជ្រើសរើសយក Cristiano ព្រោះគេជាកីឡាករល្អបំផុត ហើយ Zlatan ក៏អាចហៅថាជាកីឡាករដ៏ល្អម្នាក់ដែរ ប៉ុន្តែ Messi ជាកីឡាករឆ្នើមមួយរូប។ អ៊ីចឹងហើយខ្ញុំនឹងរើសយក Cristiano នៅលេខរៀងទី១ ,Messi នៅលេខរៀងទី២ និង Zlatan នៅលេខរៀងទី៣។
ក្រៅពីនោះអ្នកប្រដាល់វ័យ៣២ឆ្នាំរូបនេះក៏បានបង្ហើបដែរថាគេធ្លាប់មានក្ដីស្រមៃចង់ក្លាយជាកីឡាករបាល់ទាត់ទៀតផងហើយគេក៏បាននិយាយដែរថាគេជាមិត្តល្អម្នាក់របស់ Cristiano Ronaldo ដោយពួកគេបាននិយាយឆ្លើយឆ្លងគ្នាសឹងតែរាល់ថ្ងៃ។
គួរបញ្ជាក់ផងដែរថា Khabib Nurmagomedov បានចូលនិវត្តន៍ពីសង្វៀន UFC កាលពីខែតុលាឆ្នាំ២០២០កន្លងទៅនេះបន្ទាប់ពីវាយឈ្នះអ្នកប្រដាល់ Justin Gaethje ដោយរក្សាកំណត់ត្រាវាយឈ្នះទាំង២៩ដងនិងចាញ់០ដង៕
ប្រភព៖ thesun
Bong I.T