សុខចិត្តលក់ខាតដើម! Chelsea ត្រៀមនឹងលក់កីឡាករម្នាក់របស់ខ្លួននៅរដូវក្ដៅខាងមុខ

អង់គ្លេស៖ យោងតាមការរាយការណ៍ ក្លិបតោខៀវ Chelsea កំពុងគិតគូលក់ខ្សែបម្រើ Hakim Ziyech ដែលទើបតែផ្ទេរពីក្លិប Ajax កាលពីឆ្នាំមុនក្រោយពីកីឡាករវ័យ២៧ឆ្នាំរូបនេះមើលទៅហាក់មិនសូវកាក់កបនិងលេចធ្លោនៅទឹកដី Stamford Bridge ។

ពេលនេះ Ziyech បានត្រឡប់មកចូលរួមជាមួយក្រុមវិញហើយក្រោយរងរបួសកាលពីខែធ្នូឆ្នាំមុនពេលក្រុមនៅដឹកនាំដោយលោកគ្រូបង្វឹកចាស់ Frank Lampard នៅឡើយ ដោយថ្មីៗនេះគេទើបតែបានចូលលេងក្នុងជំនួប Chelsea ទល់នឹងក្លិបបិសាចក្រហម Manchester United ។

បើមើលតាមស្ថានភាពរបស់គេពេលនេះ Ziyech ដូចជាមិនទទួលបានការទុកចិត្តពីលោកគ្រូ Thomas Tuchel នោះឡើយព្រោះមកទល់ពេលនេះគេចូលលេងក្រោមការដឹកនាំរបស់លោកគ្រូបានតែ២ប្រកួតគត់ដូច្នេះហើយទើបមានពាក្យចចាមអារ៉ាមថាខ្សែបម្រើសញ្ជាតិម៉ារ៉ុករូបនេះអាចនឹងត្រូវក្លិបលក់ចេញ។

យោងតាមសារព័ត៌មាន Fichajes បានបង្ហើបថា Chelsea ត្រៀមនឹងលក់ Hakim Ziyech ក្នុងតម្លៃទាបជាង ៤០លានផោន (ឬប្រមាណ ៥៥លានដុល្លារ) ដោយសុខចិត្តលក់ខាតតម្លៃដើម ខណៈដែលក្លិបខ្លាឃ្មុំ Atletico Madrid កំពុងសម្លឹងចង់បានគេមកកាន់ទឹកដី Wanda Metropolitano ប៉ុន្តែទាល់តែក្លិបដែលកំពុងដឹកនាំដោយលោកគ្រូ Diego Simone មួយនេះអាចលក់ Vitolo ចេញជាមុនសិន៕

ប្រភព៖ caughtoffside