មិនធម្មតា! ស្កុតឡែននឹងដាក់ប្រតិបត្តិការដ្រូន ដើម្បីដឹកជញ្ជូនសម្ភារធ្វើតេស្ត និងយកសំណាកកូវីដ១៩ នៅ​តំបន់ដាច់ស្រយាល ចំណាយត្រឹមតែ ១៥នាទីប៉ុណ្ណោះ

ស្កុតឡែន៖ យន្តហោះដ្រូនកំពុងត្រូវបានគេដាក់ឱ្យប្រើប្រាស់នៅស្កុតឡែន ដើម្បីបង្កភាពងាយស្រួលដល់អាជ្ញាធរក្នុងការយកសំណាកតេស្តអ្នកជំងឺកូវីដ១៩ ព្រមទាំងដឹកជញ្ជូនសម្ភារវេជ្ជសាស្ត្រផ្សេងៗទៀត ឆ្លងកាត់ទីតាំងបួននៅភាគខាងលិចស្កុតឡែនដែលមានចម្ងាយសរុបជិត ៦៤ គីឡូម៉ែត្រ។ នេះបើតាមការចុះផ្សាយរបស់សារព័ត៌មាន Dailymail។

ក្រុមហ៊ុនដ្រូន Skyports បានក្លាយទៅជាប្រតិបត្តិករដំបូងគេ ដែលទទួលបានការអនុញ្ញាតពីអាជ្ញាធរអាកាសចរណ៍ស៊ីវិលចក្រភពអង់គ្លេស (CAA) ក្នុងការយកសំណាក និងដឹកជញ្ជូនសម្ភារទំនិញដែលមានដូចជា សំណាកគំរូ ឧបករណ៍ធ្វើតេស្ត ថ្នាំពេទ្យ និងឧបករណ៍ការពារផ្ទាល់ខ្លួន (PPE) ជាដើម នៅក្នុងតំបន់ Argyll & Bute។

ដ្រូនទាំងមូលអាចផ្ទុកទម្ងន់បានចំនួន ៣ គីឡូក្រាម និងចំណាយពេលត្រឹមតែ ១៥ នាទីបណ្ណោះក្នុងការដឹកជញ្ជូនគំរូសំណាកនិងសម្ភារ ខណៈមធ្យាបាយផ្សេងទៀតដូចជាការដឹកជញ្ជូនតាមផ្លូវគោក និងផ្លូវទឹកត្រូវចំណាយពេលជាង ៣៦ ម៉ោង។ ដោយឡែក ជាមួយនឹងដ្រូនដ៏តូចច្រឡឹងនេះ គេអាចជំរុញការផ្គត់ផ្គង់សេវាកម្មជូនដល់អ្នកជំងឺ និងបុគ្គលិកថែទាំសុខភាពនៅតាមតំបន់ដាច់ស្រយាលបានយ៉ាងមានប្រសិទ្ធភាព។

គួរបញ្ជាក់ថា ប្រតិបត្តិការដ្រូននេះនឹងត្រូវដាក់ឱ្យដំណើរការរវាងមន្ទីរពេទ្យ Lorn & Islands, មន្ទីរពេទ្យសហគមន៍ Mid-Argyll, មជ្ឈមណ្ឌលអនុវត្តន៍វេជ្ជសាស្រ្ត Easdale, និងមន្ទីរពេទ្យសហគមន៍ Mull & Iona នៅរយៈពេល ៣ ខែខាងមុខនេះ។ លើសពីនេះ ទីភ្នាក់ងារអវកាសអង់គ្លេសក៏បានផ្តួចផ្តើមផ្តល់មូលនិធិចំនួនប្រមាណ ១,៣៣៨,០០០ លានដុល្លារ ក្នុងការថែទាំសុខភាពប្រជាជន ជាពិសេសតាមរយៈបច្ចេកវិទ្យាអវកាសដ្រូននេះផងដែរ៕