អាណិតណាស់! ឆ្មា​មួយក្បាល សម្រក់ទឹកភ្នែកដាក់កាម៉េរាសុវត្ថិភាព ខណៈម្ចាស់​ទុកឱ្យនៅផ្ទះម្នាក់ឯង (មានវីដេអូ)

ចិន៖ កាលពីពេលបុណ្យចូលឆ្នាំចិនកន្លងទៅនេះ វីដេអូដ៏ល្បីល្បាញពេញបណ្ដាញសង្គមមួយ​ក្នុងប្រទេសចិន បានបង្ហាញឱ្យឃើញសត្វឆ្មាចិញ្ចឹមមួយក្បាល សម្រក់ទឹកភ្នែករបស់វាដាក់កាម៉េរាសុវត្ថិភាព ខណៈពេលម្ចាស់មិននៅផ្ទះ។

វីដេអូកាម៉េរាសុវត្ថិភាពបានថតនៅយប់ថ្ងៃទី​ ៨ ខែកុម្ភៈកន្លងទៅ នៅក្នុងទីក្រុង Xuzhou ភាគខាងកើតនៃប្រទេសចិន បន្ទាប់ពីអ្នកនាង Meng ដែលជាម្ចាស់សត្វឆ្មាមានឈ្មោះថា Fu Fu បានទៅចូលរួមអបអរពិធីបុណ្យចូលឆ្នាំថ្មី ជាមួយឪពុកម្តាយរបស់នាង។

ក្នុងនោះ អ្នក​នាង Meng បានប្រាប់ទៅសារព័ត៌មាន MailOnline ដូចនេះថា ដោយសារតែ Fu Fu ជាសត្វឆ្មាមានភាពខ្មាសអៀនច្រើន ហើយមិនងាយចុះសម្រុងនឹងបរិយាកាសថ្មី​ ទើប​នាងសម្រេចចិត្តមិនយកវាទៅផ្ទះឪពុកម្តាយរបស់ខ្លួន។ ប៉ុន្ដែយ៉ាងណា នាងក៏បានរៀបចំណីអាហារ និងទឹកគ្រប់គ្រាន់ ព្រមទាំងតាមដាន Fu Fu តាមរយៈកាម៉េរាសុវត្ថិភាពជានិច្ចផងដែរ។

ជាក់ស្ដែង នៅក្នុងវីដេអូដ៏រំជើបរំជួលមួយនេះ គេឮ​សំឡេងរបស់​អ្នកនាង Meng និយាយទៅកាន់សត្វចិញ្ចឹមរបស់ខ្លួនថា “Fu Fu មាននឹកខ្ញុំទេ ប៉ុន្មានថ្ងៃទៀត ខ្ញុំនឹងត្រឡប់ទៅផ្ទះវិញហើយ”។

យ៉ាងណាមិញ នៅក្នុងវីដេអូបន្ទាប់ ដែលចែកចាយពេញបណ្ដាញសង្គមបានឱ្យឃើញ Fu Fu  រត់យ៉ាងលឿនសំដៅទៅរកម្ចាស់របស់វា បន្ទាប់ពី​អ្នកនាង Meng ត្រឡប់មកដល់ផ្ទះវិញ៕